Греция Беларусдан келадиган самолётлар учун ўз ҳаво ҳудудини ёпди ва миллий авиаташувчиларига Беларусга парвозларни тақиқлади. Бу ҳақда Пентапостагма нашри Греция фуқаро авиацияси бошқармаси (HCAA) баёнотига таяниб хабар берди.
HCAA томонидан эълон қилинган ҳужжатда айтилишича, Греция самолётлари ва капитанлари Беларуснинг учиш ахбороти ҳудудида парвозларни амалга оширмаслиги лозим, аммо республика осмонидан фойдаланиш «кутилмаган вазиятларда хавфсизлик учун зарур деб ҳисобланган ҳолатлар» истисно қилинади.
Беларусь самолётларига «Греция республикаси ҳудудига қўниш, ундан кўтарилиш ёки унинг устидан учиб ўтиш тақиқланади». Фавқулодда вазиятлар, шунингдек, гуманитар ва тиббий самолётлар учун истисно мавжуд.
Журналистларнинг тушунтиришича, Греция расмийларининг қарори Беларуснинг Украинадаги урушда иштирок этиши мумкинлиги ҳақидаги хавотирлар билан боғлиқ.
Беларусь Минск Украинадаги можарода иштирок этиш ниятида эмаслигини бир неча бор таъкидлаган. Аммо сўнгги ойларда мамлакатда Россия жангчилари ва қуроллари, жумладан, танклар ва бронетранспортёрлардан иборат минтақавий қўшинлар гуруҳи жойлаштирилди. 20 декабрь куни Москва ва Минск ягона мудофаа майдонини яратишга келишиб олди.
Европа Иттифоқи 2021 йил июнь ойида Беларуснинг барча авиакомпанияларига иттифоқ мамлакатлари устидан парвоз қилишни тақиқлаган эди. Санкциялар Ryanair авиакомпаниясининг Беларусга мажбуран қўндирилишига жавоб бўлди, унда Беларусь мухолифатининг Nexta Telegram канали собиқ бош муҳаррири (Беларусда террорчи ташкилот сифатида тан олинган ва тақиқланган) Роман Протасевич бўлган. Афинадан Вильнюсга учаётган самолёт 2021 йил 23 май куни бортида бомба борлиги ҳақида хабар билан Минскда қўнишга мажбур бўлган. Мина ҳақидаги маълумотлар тасдиқланмаган. Самолёт Минскда бўлиб турганида Протасевич ва унинг севгилиси Софя Сапега қўлга олинган.
Изоҳ (0)