Нетаньяху Исроилнинг янги ҳукуматини тузишга муваффақ бўлганини эълон қилди

Исроил собиқ бош вазири, «Ликуд» партияси раҳбари Бенямин Нетаньяху мамлакатда янги Вазирлар Маҳкамаси тузилганини маълум қилди. ОАВ хабарларига кўра, янги ҳукумат таркибига ўнг қанот консерватив блок, жумладан, «Диний сионизм» партияси вакиллари киради.

«Охирги сайловларда биз эришган улкан жамоатчилик қўллаб-қувватлови туфайли мен Исроилнинг барча фуқаролари манфаати учун ишлайдиган ҳукуматни яратишга муваффақ бўлдим», — деб ёзди Нетаньяху ўзининг Twitter’ида. Шунингдек, у ўз постига Исроил президентига қўнғироғи аудиосини илова қилган.

Нетаньяху президент Исхак Герцогга «Ликуд» фракциялари, «Диний сионизм», «Шас», «Яҳадут ха-Тора», «Оцма Еҳудит» ва «Ноам» партияларини ўз ичига олган янги ҳукумат барча Исроил фуқаролари манфаати учун ишлашини айтди, дейилади Jerusalem Post газетасида.

Нетаньяхунинг яна бош вазир лавозимини эгаллаши учун сўнгги сана 2 январь бўлиши тахмин қилинганди. Бироқ кўплаб хабарларга кўра, янги коалиция келаси ҳафта охиригача ҳукумат қасамёдини ўтказишга уринмоқда.

Нетаньяхунинг ҳукумат тузиш мандати 11 декабрда тугаган. Кейинчалик Герцог унга яна ўн кун вақт берган.

Исроил қонунчилигига кўра, агар бош вазирликка номзод белгиланган муддатда ҳукумат туза олмаса ва унинг таркибини парламентда тасдиқлата олмаса, президент бу вазифани бошқа номзодга топшириши мумкин.