Россиянинг космик тармоғини бошқарувчи «Роскосмос» давлат корпорацияси собиқ раҳбари Дмитрий Рогозин Донецкда меҳмонхона ўққа тутилиши оқибатида яраланди. У касалхонага ётқизилган, ҳаёти хавф остида эмас. Бу ҳақда «ТАСС» ва «РИА Новости» Рогозиннинг ёрдамчисига таяниб хабар берди.
«Донецк ташқарисидаги меҳмонхона ўққа тутилган, у ерда сўнгги кунларда Дмитрий Рогозин бошчилигидаги ҳарбий маслаҳатчилар гуруҳи яшаб келаётган эди. Дмитрий Олегович белидан жароҳат олди. У касалхонага ётқизилди. Ҳаётига нисбатан хавф йўқ», — деди ёрдамчи. Унинг сўзларига кўра, Рогозиннинг йўлдошлари ҳам яраланган.
«Белимдан яраландим. Лекин яшайман. Ўқ бўлаги умуртқа поғонасидан бир сантиметр нарироқдан кирган», — дея собиқ мансабдорнинг ўзи олинган жароҳатларини изоҳлади.
Ўз навбатида, Baza хабар беришича, Донецкда Рогозин туғилган кунини нишонлаётган ресторан ўққа тутилган.
Баъзи маълумотларга кўра, ресторанга ўқ ёғдирилиши оқибатида беш киши яраланиб, камида бир киши — ДХР ҳукумати раиси Виталий Хоценконинг қўриқчиси ҳалок бўлган бўлиши мумкин. Хоценконинг ўзи, Baza ёзишича, яраланган.
Дмитрий Рогозин тўрт йиллик фаолиятидан кейин, 2022 йил июлида «Роскосмос» раҳбари лавозимидан озод этилган эди. Унинг ўрнини бунгача Россия бош вазири ўринбосари ваколатларини бажариб келган Юрий Борисов эгаллади.
«Роскосмос»дан ишдан кетганидан кейин Рогозин ўз Telegram-каналида уруш ҳақида кўп ёзадиган бўлди. 2022 йил ноябрида у «Шоҳ бўрилари» номи остида ҳарбий маслаҳатчилар гуруҳини тузиб, унга раҳбарлик қилаётганини маълум қилди, бу гуруҳ ДХР ва ЛХР жанговар бўлинмаларига ҳарбий-техник кўмак бериш билан шуғулланади.
Мавзуга доир:
- Россия Украинадаги ҳарбий ҳаракатларни кузатиб бориш учун мингта сунъий йўлдошни ишга туширади
- Европа космик агентлиги Россия билан Ойни тадқиқ қилиш дастури доирасидаги ҳамкорликни тўхтатди
- Европа космик агентлиги Марсни тадқиқ қилишда «Роскосмос» билан ҳамкорликдан бош тортди. Россия Марсга ўзи миссия жўнатмоқчи
Изоҳ (0)