Пашинян Тоғли Қорабоғдаги Россия тинчликпарвар кучларини ўз вазифасини бажармаганликда айблади

Арманистон бош вазири Никол Пашинян Озарбайжон томонидан Лочин йўлаги ёпиб қўйилгани сабаб Тоғли Қорабоғда оғир гуманитар вазият юзага келганини маълум қилди. Унинг сўзларига кўра, Арманистонни Қорабоғ ҳудуди билан боғлайдиган ягона йўлнинг тўсиб қўйилиши ортидан у ерда озиқ-овқат муаммоси бошланган.

«Бокунинг ҳаракатлари ноқонунийдир ва халқаро мажбуриятларни, хусусан, 2020 йил 9 ноябрдаги уч томонлама баёнот қоидаларини бузади», — деди Пашинян Арманистон Вазирлар Маҳкамаси мажлисида.

Арманистон бош вазири, шунингдек, Россия тинчликпарвар корпуси кучларини ўз мажбуриятларини бажармаётгани учун танқид қилди. «Албатта, бу Озарбайжоннинг ҳаракатлари билан боғлиқ, аммо бу масаланинг моҳиятини ўзгартирмайди. Россия тинчликпарвар кучларининг у ердан бўлишидан асосий мақсад — ноқонуний ҳаракатларга йўл қўймаслик ва Лочин йўлагини назорат остида ушлаб туриш», — деди бош вазир.

Бундан ташқари, Пашинян Арманистон Озарбайжонга можарони тинч йўл билан ҳал қилиш бўйича ўз таклифларини тақдим этганини айтди. «Биз шу мазмундаги шартномани имзолашга тайёрмиз ва умид қиламанки, Озарбайжоннинг жавоби ижобий бўлади», — дея қўшимча қилди у. Шунингдек, унинг сўзларига кўра, Озарбайжон томонига минтақавий коммуникацияларни очиш ва чегарани делимитация ва демаркация қилиш комиссиясининг кейинги фаолияти юзасидан таклифлар юборилган.

3 декабрь куни Тоғли Қорабоғ вакиллари Озарбайжон ҳарбийлари республика пойтахти Степанакертни Арманистон билан боғловчи Лочин йўлагини тўсиб қўйганини маълум қилди. Россия тинчликпарвар кучлари автомагистрални очиш учун музокараларга киришиши керак эди.

12 декабрь куни Озарбайжон фуқароларининг Озарбайжон назорати зонасидан ташқаридаги конда қазиб олинган рудани минтақадан экспорт қилишни тўхтатишни талаб қилувчи норозилиги туфайли Лочин йўлаги транспорт ҳаракати учун ёпилди. 13 декабрь куни Озарбайжон Арманистондан Тоғли Қорабоғга газ етказиб берилишини тўхтатди.

14 декабрь куни Ереван Инсон ҳуқуқлари бўйича Европа судига мурожаат қилиб, Бокуни Лочин йўлагини блокдан чиқаришга мажбурлашни сўради. 20 декабрь куни БМТ Хавфсизлик кенгашининг йиғилиши бўлиб ўтди, унда иштирокчилар йўл тўсиқларини очишга чақирди.