Украина Қуролли кучлари бош штаби 22 декабрь куни эрталабки ҳисоботида Россия қўшинлари босқин бошланганидан бери 100 минг киши, уч минг танк ва олти мингга яқин бошқа зирҳли техникасидан айрилганини маълум қилди.
9 декабрь ҳолатига BBC Рус хизмати, «Медиазона» ва очиқ манба кўнгиллилари Украинада 10 002 россиялик ҳарбий ҳалок бўлганини тасдиқлаганди.
Украина ва Россия мунтазам равишда душман томоннинг қурбонлари ҳақида хабар беради, лекин ўзлари ҳақида камдан-кам ҳолларда маълумотларни ошкор қилади. Россия Мудофаа вазири Сергей Шойгу Россиянинг йўқотишлари ҳақида охирги марта сентябрь ойида гапирганди. Ўшанда Шойгу Украинада уруш бошланганидан бери 5 937 нафар рус аскари ҳалок бўлганини айтган.
Ноябрь ойи бошида АҚШ штаблари бошлиқлари қўмитаси раҳбари Марк Милли россиялик аскарлар орасида ҳалок бўлган ва яраланганлар сони 100 минг кишидан ошганини маълум қилган. Унинг баҳолашича, Украина томони ҳам худди шундай йўқотишларга учраган.
Декабрь ойи охирида Еврокомиссия раҳбари Урсула фон дер Ляйен Россиянинг Украинага босқини бошланганидан бери 100 минг украиналик ҳарбий ҳалок бўлгани ҳақида видеомурожаат йўллаганди, бир муддат ўтиб видеода Украина томонининг йўқотишлари ҳақидаги кадрлар кесиб ташланди.
Изоҳ (0)