Жаҳон соғлиқни сақлаш ташкилоти (ЖССТ) раҳбари Тедрос Адханом Гебрейесус келгуси йил учун ташкилотнинг бешта устувор йўналишларини белгилади.
Брифингда сўзга чиққан Гебрейесус 2022 йилда, COVID-19 пандемиясининг учинчи йилида ҳам глобал чечак, кўплаб мамлакатларда вабо ва Угандада Эбола эпидемияси авж олганини айтди. Бундан ташқари, Африка Катта шохи ва Саҳелда қурғоқчилик ва сув тошқинлари содир бўлгани ва Покистонда кучли сув тошқини юз бергани қайд этилди.
Бироқ Гебрейесуснинг таъкидлашича, COVID-19 пандемияси, шунингдек, чечакнинг глобал тарқалиши камаймоқда, Угандада Эбола билан боғлиқ янги ҳолатлар уч ҳафтадан кўпроқ вақт давомида кузатилмаган.
«Умид қиламизки, бу фавқулодда вазиятларнинг барчаси келгуси йилда якунланади», — деди у.
ЖССТ раҳбари бутун дунё бўйлаб COVID-19 дан ўлим кескин камайганини қўшимча қилди, шу билан бирга пандемия ҳали тугамагани ҳақида огоҳлантирди.
Гебрейесус 2023 йилда ЖССТ учун бешта устувор йўналишни белгилаб берди:
- саломатликни мустаҳкамлаш ва касалликларнинг олдини олишга эътибор бериш;
- тиббий хизматлардан, айниқса, бирламчи тиббий-санитария ёрдамидан ҳамма фойдаланишини таъминлаш;
- фавқулодда вазиятларга тайёргарлик кўриш ва уларни бартараф этиш чораларини кучайтириш;
- тадқиқот, фан ва технологияни ривожлантириш;
- ЖССТни ислоҳ қилишни давом эттириш.
Изоҳ (0)