Россия мудофаа вазири Сергей Шойгу «махсус ҳарбий операция зонасига бориб», қуролли кучлар бўлинмаларини текширди. Бу ҳақда вазирлик матбуот хизмати хабар берди.
Шойгу ҳарбий қисм пунктларида шахсий таркиб ва ҳарбий техникани жойлаштириш шартларини текширган. Бўлинма командирларини тинглаш чоғида мудофаа вазири урушга жалб қилинган қўшинларни қўллаб-қувватлашдаги ташкилий ишларга эътибор қаратган. Мудофаа вазири ҳарбий қисмларнинг жойлашув ҳудуди, иситиш, таом тайёрлаш ва овқатланиш шароитларини кўздан кечирган.
Шунингдек, Шойгу гуруҳ ҳарбий хизматчилари билан суҳбатлашган ва уларга «махсус ҳарбий операция» топшириқларини намунали бажаргани учун миннатдорлик билдирган.
Россия Мудофаа вазирлиги Шойгунинг айнан қаерга борганига аниқлик киритмади ва ҳодиса жойидан фотоматериалларни чоп этмади.
18 декабрь куни Мудофаа вазирлиги Шойгу «қўшинлар жойлаштирилган ҳудудлар бўйлаб учиб ўтгани ва ‘ҳарбий операция’ зонасидаги рус бўлинмалари позицияларини текширганини» маълум қилди. Шундан кейин Мудофаа вазирлиги Шойгу вертолёт ойнасидан мудофаа иншоотларини қандай текшираётгани акс этган видеони тарқатди. Ёзув таҳлили шуни кўрсатдики, Шойгу Armyанск қишлоғи ҳудудида, яъни фронт чизиғидан 80 километр узоқликда парвоз қилган.
20 декабрь куни Украина президенти жанг кечаётган Бахмутга борди. Бу хабардан сўнг, Россия президенти матбуот котиби Дмитрий Песков Владимир Путин, гўёки биринчи марта жанговар ҳаракатлар зонасига боргани ҳақида хабар берди. Расман Путин жанговар ҳаракатлар зонасига бирор марта ҳам боргани йўқ. Ўз навбатида, Украина президенти Владимир Зеленский тўлиқ кўламли уруш даврида Донецк вилоятининг Словянск шаҳрига ташриф буюрганди. 14 ноябрь куни эса ўққа тутилган Херсонга борган.
Изоҳ (0)