Шавкат Мирзиёев Олий Мажлисга мурожаатномасида Самарқанд ва Наманган шаҳарларини алоҳида маъмурий-ҳудудий бирликлар сифатида республика бўйсунувига ўтказиш таклифини билдирди. «Дарё» мухбири Азизбек Абдувалиев Наманган шаҳри ҳокими Ғофиржон Жамалов билан учрашиб, мазкур ташаббус бўйича фикр-мулоҳазалари билан қизиқди.
«Бугунги кунни шаҳримиз учун тарихий сана деб ҳисоблаш мумкин. Чунки давлат раҳбари Наманган саноат, тадбиркорлик, таълим ва маданият соҳаларида минтақавий марказ сифатида ўз ўрнини топаётганини алоҳида эътироф этди. Чиндан ҳам шаҳар шиддат билан ривожланмоқда. Оддий мисол, 2018 йилда 670 минг аҳолимиз бўлган бўлса, ҳозир миллионга яқинлашяпмиз. Охирги беш йилда 100 га яқин кўп қаватли уйлар қурилиб, 80 мингдан ортиқ хонадон фойдаланишга топширилди.
5 йил аввал 8600 та тадбиркорлик субъекти бор эди, бугунга келиб уларнинг сони 12 мингга етди. 3 йил олдин учта олий ўқув юрти фаолият кўрсатган, ҳозирда 7 та бўлди. Аҳоли нуфуси ва корхоналар сони ошиб боргани сари, табиийки, инфратузилма такомиллашиб бориши, янги иш ўринлари яратилиши зарур. Бунинг учун инвестициялар жалб этиш, хизмат кўрсатиш ва сервис, туризмни ривожлантириш талаб этилади. Бунда эса республика бўйсунувидаги шаҳар мақоми бизга катта туртки беради, амалга ошириладиган ишларимизни икки баравар жадаллаштиради», — дейди Наманган шаҳар ҳокими.
Ғофиржон Жамаловнинг қайд этишича, Наманган бугунги кунда дунёнинг 10 дан ортиқ шаҳарлари билан биродарлашган. Уларнинг тажрибаси ўрганилиб, энг мақбулларини маҳаллий шароитга татбиқ этиш чоралари кўрилмоқда. Шунингдек, транспорт тизимини такомиллаштириш, шаҳар бош режасини ривожлантириш, Янги Наманган шаҳарчасини барпо этиш каби йирик лойиҳалар амалга оширилмоқда.
«Республика бўйсунувидаги шаҳар мақомининг ижобий томонларини кўп санаш мумкин, лекин унинг барча бўғиндаги раҳбарлар учун ўзига хос салмоқли юки ҳам бор. Мурожаатномада таъкидланганидек, энди Наманган шаҳрини ҳар бир соҳа ва йўналиш бўйича янада ривожлантиришнинг қисқа ҳамда узоқ муддатли дастурлар ишлаб чиқилади. Бу дастурлар кейинчалик ҳукуматда ҳимоя қилинади. Биргина шу вазифанинг ўзи зиммамизга жуда катта масъулият юклайди», — дейди Наманган шаҳри ҳокими.
Изоҳ (0)