Президент Шавкат Мирзиёев раислигида тадбиркорлик ва саноатни ривожлантириш, аҳоли бандлигини таъминлаш чора-тадбирлари юзасидан ўтказилган видеоселектор йиғилишида яратилган имкониятларга қарамасдан, 2022 йил давомида доимий бандлар сони Китоб, Косон, Мирзаобод, Нарпай, Нишон, Фурқат туманларида камайгани кўрсатиб ўтилган эди. Сирдарё вилоятининг Мирзаобод тумани ҳокими Жонибек Яриев бунга изоҳ берди.
Мирзаобод тумани ҳудудида жойлашган ип калавани қайта ишлаш фабрикасида хом ашё билан боғлиқ муаммо кузатилган. Шунинг ҳисобига мазкур ҳолат келиб чиққан. Бундан ташқари, бошқа шу каби саноат корхоналарида солиқ органларига ишчи сонини қисқартириб кўрсатиш ҳолатлари аниқланган, — дейди Жонибек Яриев.Ҳокимнинг айтишича, шунингдек, мазкур муаммони бартараф этиш юзасидан штаб ташкил этилиб, солиқ ҳисоботларида ишчи ходимларни кам кўрсатиб ўтган 590 та корхона ва ташкилотлар билан тўлиқ ишлаш йўлга қўйиш, кўрсатиб ўтилган камчиликларни бартараф этиш юзасидан аниқ манзилли чоралар белгилаб олинди. Натижада мазкур корхоналар билан бирга ишни йўлга қўйиш орқали доимий банд аҳоли сони 2700 га етказилади.
Президент раислигидаги селекторда республика бўйича хусусий секторда фаолият кўрсатаётган 232 мингта корхонада ишчилар сони бор-йўғи 1 нафарни ташкил қилиши, бу эса улар ҳалиям «яширин иқтисодиёт» шароитида ишлаб, «конверт»да ойлик тўлаб келаётгани танқид қилинган эди.
Изоҳ (0)