Россия Хавфсизлик Кенгаши раиси ўринбосари Дмитрий Медведев Telegram’да барча британиялик сиёсатчиларни «камдан-кам учрайдиган иккиюзламачилар» деб атади ва бунга уларнинг Россия—Украина ўртасидаги эҳтимолий музокаралар ҳақидаги риторикасини мисол қилиб келтирди.
У Британия бош вазири Риши Сунакнинг Россия Украина ҳудудидан ўз қўшинларини олиб чиқмагунча, музокаралар олиб бориш мумкин эмаслиги ҳақидаги сўзларига шама қилди. Медведевнинг таъкидлашича, яна шу британияликлар музокара олиб бориш-бормасликни украиналикларнинг ўзи ҳал қилишини айтмоқда.
«Бу ёлғон, иккиюзламачилик ва ҳаддан ортиқ сурбетлик бўлмоқда», — деди Медведев.
Шунингдек у Британияга Фолкленд (Малвин) оролларини аргентиналикларга қайтаришни таклиф қилди. «Фолкленд — Британия эмас, Аргентина», — дея постини якунлаган Медведев.
15 ноябрь куни Сунак Буюк Британия Украинага Россия билан музокаралар учун «энг кучли позицияни» беришга ҳаракат қилаётганини ва бу музокараларни ўтказиш қарорини Киевга қўйиб бериш керак, деб ҳисоблашини айтганди.
«Украиналикларга қараб, сизнинг мамлакатингиз ва инфратузилмангиз бомбардимон қилинаётган бир пайтда музокаралар олиб боришингиз керак, деб айтиш бироз инсофсизлик бўлади», — деган Британия бош вазири.
Изоҳ (0)