Афғонистоннинг Ҳилманд вилоятида «Толибон» аъзолари футболчини ўлдирди. Бу ҳақда Hasht-e Subh Daily хабар берди.
Маълум қилинишича, футболчи Нава туманининг Айнак ҳудуди яқинида отиб ўлдирилган. Спортчи тахминан 30 ёшли Нажибулла экани аниқланган. У Ҳилманддаги энг машҳур футболчилардан бири бўлган. «Толибон» ҳозирча бу борада ҳеч қандай изоҳ бермаган. Футболчи ўғриликда айблангани айтилмоқда.
«Толибон» аъзолари Афғонистонда ҳокимият тепасига келганидан кейин декабрда биринчи марта оммавий қатлни амалга оширди. Жумладан, беш йил аввал содир этган қотиллик, мотоцикл ва мобил телефон ўғирлашда айбланиб, афғонистонлик эркак ўлимга ҳукм қилинди. Қатл маросимида юзлаб томошабинлар, шунингдек, давлат амалдорлари иштирок этди.
Ноябрь ойида «Толибон»нинг эзгуликни тарғиб қилиш ва иллатларнинг олдини олиш бўйича администрацияси вакили Марям исмли ўсмир қизни унга турмушга чиқишдан бош тортгани учун ўлдирганди. Маълумотни «Толибон» ҳукумати вакиллари ҳам тасдиқлаган. Эркак эса ҳибсга олинган, у ҳозир қамоқда.
Изоҳ (0)