Россиянинг Ленинград вилояти Всеволожск туманидаги мебель ишлаб чиқариш цехида содир бўлган ёнғинда ўзбекистонлик эркак ҳалок бўлди. Бу ҳақда 78.ru хабар берди.
Ёнғин 15 декабрь куни маҳаллий вақт билан эрталаб 04:00 да юз берган. Ёнғин майдони 300 квадрат метрни ташкил қилган, мебель ишлаб чиқариш устахонасида жойлашган ангар ёниб кетган. Қутқарувчилар ҳодиса жойига етиб келиб, соат 06:45 да ёнғинни ўчирган.
Ҳодисада 50 ёшли Ўзбекистон фуқароси ҳалок бўлган. Воқеа жойидан ёғли радиатор топилган. Ҳозирда ёнғин келиб чиқиш сабаблари ва моддий зарар ўрганилмоқда.
Аввалроқ Санкт-Петербург шаҳри Петроградский туманида ўзбекистонлик ишчи 7-қаватдан қулаб ҳалок бўлганди. Чапаев кўчасида жойлашган турар жой биноси қурилиши вақтида 45 ёшли ишчи баландликдан қулаган. У олган тан жароҳатлари туфайли воқеа жойида ҳалок бўлган. Ҳолат юзасидан жиноий иш қўзғатилган.
Изоҳ (0)