Германия собиқ канцлери Ангела Меркелнинг Минск келишувларидан асл мақсад ҳақидаги сўзлари қўрқитмоқда, деди Австрия собиқ вице-канцлери (2017—2019) Хайнс-Кристиан Штрахе Украинадаги урушга бағишланган Вена давра суҳбатида.
«Германия собиқ канцлери Ангела Меркель Минск келишувларига жиддий қаралмаганини, улар Украинага вақт бериш учун қабул қилинганини айтди. Меркель бу ҳақда қандай очиқ гапираётгани бизни чўчитмоқда. Шу тарзда биз ишонч учун ҳар қандай асосларни йўқ қиляпмиз», — деди Штрахе.
Германиянинг собиқ канцлери Ангела Меркель 7 декабрь куни Zeit нашрига берган интервьюсида Минск келишувлари «Украинага вақт бериш» учун керак бўлгани, Киев эса бу келишувлардан «кучлироқ бўлиш учун» фойдаланганини айтганди. Кремль Минск келишувлари «вақтни чўзиш» деган фикрга қўшилган. Россия президенти Владимир Путин Меркелнинг сўзларини кутилмаган ва ҳафсалани пир қиладиган деб топди. «Афтидан, ҳеч ким Минск келишувларининг барчасини бажармоқчи эмас», — деди у. Аммо Путиннинг айтишича, Меркелнинг сўзлари Украинада «махсус операция» ўтказиш тўғрисидаги қарорнинг тўғрилигидан далолат беради.
Минск келишувлари 2014—2015 йилларда Донбассдаги вазиятни тартибга солиш бўйича Уч томонлама алоқа гуруҳи томонидан қабул қилинган. Унинг таркибига Россия, Украина ва Европа хавфсизлик ва ҳамкорлик ташкилоти вакиллари кирган. Битимларни Россия, Украина, Франция президентлари ва Германия канцлери (ўша пайтда Меркель эди) қўллаб-қувватлаган. 2022 йилнинг октябрь ойида Россия собиқ бош вазири Сергей Степашин Меркель Путинни Минск келишувларини имзолашга «кўндирган асосий сиёсатчи» бўлганини айтди.
Изоҳ (0)