9 декабрь куни Ҳиндистон ўз ҳудудига Хитой ҳарбийлари кириб келишининг олдини олган. Бу ҳақда мамлакат мудофаа вазири Ражнатх Сингх маълум қилди, деб ёзади «РБК».
«Хитой ва ҳинд қўшинлари ўртасида қўл жанги бўлиб ўтди. Ҳиндистон қўшинлари Хитой халқ озодлик армияси қўшинларининг ҳудудимизга киришига йўл қўймади», — деди у.
9 декабрь куни Ҳиндистоннинг Аруначал-Прадеш штати ғарбидаги Таванг округида Ҳақиқий назорат чизиғи бўйлаб ҳинд ва хитой ҳарбийлари ўртасида тўқнашув бўлиб ўтгани хабар берилганди. АНИ агентлиги манбаларига кўра, иккала томондан ҳам бир неча ҳарбий хизматчи енгил жароҳатланган. Шундан кейин Ҳиндистон ва Хитой кучлари чегарадан олиб кетилган.
Ҳақиқий назорат чизиғи Жанубий Тибетда Ҳиндистон ва Хитой ўртасида талашилаётган чегара ҳудудларда шартли демаркация чизиғи бўлиб ҳисобланади. Хусусан, Ҳиндистон Тибет тоғликларининг Пекин назорати остидаги қисмлари, Аксайчин ҳудудига даъвогарлик қилмоқда, Хитойнинг даъвоси эса Нью-Дели назорати остидаги Аруначал-Прадеш ҳудудига тааллуқли.
Баҳс сабаблари ХХ аср бошига бориб тақалади, ўшанда Тибет ўз мустақиллигини эълон қилганидан кейин унинг Британия Ҳиндистони билан чегараси сўнггисининг фойдасига сурилган эди. Пекин бу қарорни тан олмади ва 1951 йилда Тибетни ўз назорати остига олгач, Нью-Делига ҳудудий талабларини билдира бошлади.
Чегара ҳудудида биринчи қуролли низо 1962 йилда юз берган, ўшанда фаол жанговар ҳаракатлар қарийб бир ой давом этган. Хитой Тавангни вақтинчалик эгаллаб олди, аммо кейинроқ чекинди ва сулҳ тузилди.
Хитой ва Ҳиндистон ҳарбийлари ўртасида бир неча марта тўқнашувлар юз берган, уларнинг сўнггиларидан бири 2020 йил июнида бўлиб ўтганди. Жанг қарийб олти соат давом этган, ўқотар қуроллар эмас, фақат таёқ, тош ва михли дубинкалар қўлланилган. 20 нафар ҳинд ҳарбийси ҳалок бўлган, Хитой томонидаги қурбонлар сони номаълум. Ҳиндистон ТИВ воқеада Хитойни айблаган.
Изоҳ (0)