«Роскомнадзор» (Россиянинг алоқа, ахборот технологиялари ва оммавий коммуникацияларни назорат қилиш федерал хизмати) Қозоғистоннинг «Власт» нашрига Россиянинг Украинадаги босқини ҳақидаги хабарларни сайтдан олиб ташлашни талаб қилувчи ва рад жавобини олган тақдирда нашрни блоклаш билан таҳдид қилувчи бир қатор хабарномалар юборди. Нашр муҳаррирлари эса «Роскомнадзор»нинг талабларини бажармоқчи эмаслигини маълум қилди.
«Власт – Қозоғистон нашри, унинг фаолияти Россия қонунлари ва назорат органлари томонидан тартибга солинмайди. Таҳририят Украинадаги уруш ҳақида берилган бу ёки бошқа янгиликларни олиб ташлаш ниятида эмас ва ҳарбий цензурага масъул Россия идорасининг бу борада қандай фикрда бўлишидан қатъи назар, бундай янгиликларни ёритишда давом этади», — дейилади нашр баёнотида.
«Власт» нашри ёзишича, «Роскомнадзор», хусусан, Россия ҳарбийлари томонидан Украинанинг Винница шаҳри ўққа тутилгани, оқибатда 20 дан ортиқ одам ҳалок бўлгани ҳақидаги хабарни, шунингдек, аннексия қилинган Мариуполда тинч аҳоли ҳалок бўлгани ҳақидаги хабарларни олиб ташлашни талаб қилган.
Украинада уруш бошланганидан кейин Россияда минглаб интернет ресурслари блокланди. Кўп ҳолларда веб-сайтлар Россия ҳарбийларининг ҳаракатларига оид «нотўғри маълумотлар»га тўла деган баҳона билан блокланган. Биргина 2022 йилнинг 5 декабридан 11 декабрига қадар Россияда 14,8 мингта сайтга кириш блокланди.
Изоҳ (0)