«Дарё» нашри 6 декабрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Пентагон Украинага берилган HIMARS мажмуаларини яширинча ўзгартириб, уларни Россия ҳудудига зарба бериш имкониятидан маҳрум қилган
АҚШ ўзи Украинага ҳарбий кўмак сифатида тақдим этган HIMARS баравар ўт очиш реактив тизимларини яширинча модификация қилиб, уларни Россия ҳудудларига узоқ масофали ракеталар учириш имкониятидан маҳрум этган. Бу ҳақда The Wall Street Journal Америка маъмуриятидаги манбаларига таяниб хабар берди.
Вашингтон Москва билан низо кучайиб кетиши хавфини камайтириш учун шундай чора кўрган, дейди газета суҳбатдошлари.
Хусусан, модификация қилинган қурилмалардан парвоз масофаси 300 километргача бўлган ATACMS ракеталарини учириш учун фойдаланиб бўлмайди. АҚШ Украинага бундай ракеталарни етказиб бермаган, бироқ Киев ATACMS’ни бошқа манбалардан олган тақдирда, уларни HIMARS орқали қўллаш имкониятини чеклаб қўйди.Украина АҚШдан 20 та HIMARS старт қурилмаларини ва парвоз масофаси 80 километргача бўлган ракеталарнинг катта захирасини қабул қилиб олганди. Бу ракеталар Украина қуролли кучлари томонидан Россия босиб олган ҳудудларда уларнинг ўқ-дори омборлари ва қўмондонлик марказларига зарбалар бериш учун қўлланади.
Таъкидланганидек, HIMARS топширилаётган вақтида президент Владимир Зеленский АҚШга улар Россия ҳудудидаги нишонларга зарбалар беришда қўлланмаслиги ҳақида шахсан ўзи ваъда берган.
Мўғулистон пойтахтида оммавий намойишларнинг кетма-кет 3 кун содир бўлиши сабаби нимада?
Мўғулистон пойтахти Улан-Баторда оммавий норозилик акциялари учинчи кун ҳам давом этмоқда, намойишчилар мансабдорларни кўмир етказиб бериш соҳасидаги коррупцияларда айбламоқда. Бу ҳақда Мўғулистоннинг Сонин нашри хабар беради.
Мўғулистон пойтахти раҳбари Долгорсуренгийн Сумяабазар пойтахтдаги марказий майдонда ва ҳукумат қароргоҳи яқинида намойишга чиққанларни куч билан тарқатиш ҳақида буйруқ берди.
«Бугунги намойишлар рўйхатга олинмаган ва уларда қатнашаётган фуқаролар хавфсизлиги тўлиқ таъминланмаган. Шу тариқа, миллий хавфсизликка, инсон ҳуқуқ ва эркинликларига зарар етказиб, жамоат тартибини бузиши мумкин бўлган тартибсизликлар муносабати билан, тегишли моддалар асосида Улан-Батор губернатори акцияларни тарқатиб юбориш ҳақида фармон чиқарди», — дейилади хабарда.
Таъкидланишича, полициячилар оломонни тарқатиш учун куч қўллашига ҳожат бўлмаган, чунки Улан-Батордаги намойишлар тинч йўл билан якунланган.
Бу орада Хитой Ташқи ишлар вазирлиги расмий вакили Мао Нин Хитой тегишли сўров келиб тушган тақдирда, Мўғулистонга эҳтимолий ўғриликларни текширишда ёрдам беришга тайёрлигини билдирди.
Эслатиб ўтамиз, Мўғулистонда 3 декабрь куни Хитойга экспорт қилинадиган кўмир атрофида коррупция можароси юз берди.
Шимолий Корея жанубни «провокацион ҳаракатлар»ни тезликда бас қилишга чақирмоқда
Корея халқ армияси Бош штаби ҳарбийларга Жанубий Корея ва АҚШ томонидан чегара яқинида отилган ўқларга жавобан, артиллериядан ўт очишни буюрди. Бу ҳақда Yonhap хабар бермоқда. Шимолий Корея ҳарбийлари Сеулни фронт яқинидаги ҳудудларда баравар ўт очиш реактив тизимлари ва гаубицалардан ўқ отишда айблади.
«Биз жиддий огоҳлантириш бериш учун зудлик билан олд артиллерия қисмларига денгиз томонга қарата артиллериядан ўт очишни буюрдик», — деди Бош штаб вакили Жанубни «провокацион ҳаракатлар»ни тезликда бас қилишга чақириб.Жанубий Корея ва АҚШ ҳарбий машғулотлари Сеулдан 71 км шимоли-шарқда, Чхорвон уездида бўлиб ўтмоқда.
Шимолий Корея аввалроқ манёврларга жавобан, шарқий ва ғарбий қирғоқ яқинидан денгиз томонга қарата 130 та артиллерия снарядларини учирганди.
Аввалроқ АҚШ, Жанубий Корея ва Япония Шимолий Кореянинг бир қатор амалдорларига нисбатан санкциялар жорий қилганди. Бу амалдорлар КХДРнинг қурол-яроғ ишлаб чиқариш дастурларига алоқадор.
Эндиликда ўзбекистонликлар давлат органи ва мансабдор шахс устидан 6 ой муддатда судга шикоят қилишлари мумкин
Бугун, 6 декабрь куни Олий Мажлис Қонунчилик палатасида «Маъмурий суд ишларини юритиш тўғрисидаги кодексига ўзгартиш киритиш ҳақида»ги қонун лойиҳаси биринчи ўқишда кўриб чиқилди.
Статистикага кўра, маъмурий судлар томонидан 2021 йилда 15 мингдан ортиқ иш кўрилган. Шундан 5 минг 300 дан ортиқ аризаларни қаноатлантириш рад этилган. Шу аризаларнинг 883 таси шикоят қилиш муддати ўтгани сабабли рад этилган.
Мажлисда Олий суд раиси ўринбосари Шуҳрат Полвонов қонун лойиҳаси ҳақида ахборот берди.
Бугунги кунда давлат органи қарори, мансабдор шахс устидан судга шикоят қилиш учун белгиланган муддатнинг қисқа экани фуқаро ва тадбиркорлик субъектларининг бузилган ҳуқуқларини тиклаш имконини бермаяпти. Шу сабабли, кенг жамоатчилик, хусусан, соҳада фаолият юритиб келаётган амалиётчи юристлар, ҳуқуқшунос блогерлар томонидан билдирилган таклиф ва мулоҳазалар, суд амалиёти таҳлили натижаларидан келиб чиқиб, ушбу муддатни қайта кўриб чиқиш ва муддатни 3 ойдан 6 ойгача узайтириш таклифи кўрилмоқда.
Шуҳрат Полвоновнинг қўшимча қилишича, қонун лойиҳаси жамоатчилик муҳокамасидан ўтказилган ва давлат бюджетидан қўшимча харажатларни талаб этмайди.
Изоҳ (0)