Беларусь армиянинг жанговар тайёргарлигини текширмоқда

Беларусь Мудофаа вазирлиги қуролли кучларнинг жанговар тайёргарлиги бўйича машғулотлар бошлади. Бу ҳақда вазирлик ахборот хизмати хабар берди.

Маълум қилинишича, машғулотлардан кўзланган мақсад қўшинларнинг жанговар ва сафарбарлик тайёргарлигини талаб даражасида текшириш, ҳарбий қўмондонлик ва назорат органларининг ҳамжиҳатлигини оширишдан иборат. Бундан ташқари, Беларусь ҳарбийлари қўмондонларнинг амалий кўникмаларини ошириш ва шахсий таркибни турли шароитларда ҳаракат қилиш учун тайёрлашни режалаштирмоқда.

«Машғулотларнинг умумий йўналиши барча тоифадаги ҳарбий хизматчи, бўлинма, ҳарбий қисм, тузилма, ҳарбий қўмондонлик ва назорат органлари билан кетма-кет машғулотлар мажмуасини ўтказишдан иборат», дейилади хабарда.

Беларуснинг Россия—Украина низосига муносабати

Сентябрда Лукашенко Беларусь ўз ҳудуди орқали Россия армиясига яширинча зарба берилишига йўл қўймаслигини маълум қилди. Кейинроқ эса у Беларусь ҳеч кимга ҳужум қилмаганини ва ҳужум қилмаслигини айтди ва Украинада қон тўкилишини тўхтатиш учун ҳамма чорани кўришга ваъда берди.

Кейинроқ Александр Лукашенко Беларусь Россия Украинага қарши олиб бораётган «махсус ҳарбий операция»да қатнашаётганини, аммо ўз ҳарбийларини зиддият ҳудудига юбормаётганини айтди. «Украинадаги махсус ҳарбий операциядаги иштирокимизга келсак, биз унда қатнашяпмиз. Буни яширмаяпмиз. Лекин биз ҳеч кимни ўлдирмаяпмиз. Ўз ҳарбийларимизни ҳеч қаерга юбормаяпмиз. Биз ўз мажбуриятларимизни бузмаяпмиз», — деди Лукашенко.

10 октябрь куни Беларусь президенти Александр Лукашенко россиялик ҳамкасби Владимир Путин билан «Иттифоқ давлати ғарбий чегараларидаги кескинлик сабабли» минтақавий қўшинлар гуруҳини кучайтириш ҳақида келишиб олганини маълум қилди.

15 октябрь куни эса минтақавий қўшин гуруҳларининг россиялик ҳарбийлардан иборат дастлабки эшелонлари Беларусга етиб келди.

25 октябрда Россия Украинага Беларусь ҳудудидан камикадзе дронлар билан зарба берди.