Ўзбекистонда 2025 йилнинг январь–июнь ойларида 23 558 та ўткир юқумли ичак касаллиги ҳолати қайд этилди. Бу ҳақда Санитария-эпидемиологик осойишталик ва жамоат саломатлиги қўмитаси ахборот хизмати АОКАда ўтказилган брифингда маълум қилди.
Энг кўп касалланиш ҳолатлари Тошкент шаҳри, Қашқадарё, Сирдарё вилоятлари ҳамда Қорақалпоғистон Республикасида кузатилган.
Маълумотларга қараганда, ичак инфекцияси энг кўп кичик ёшдаги болалар орасида қайд этилган. Жумладан,
- 1 ёшгача бўлган болалар орасида 5 мингдан ортиқ;
- 1 ёшдан 3 ёшгача бўлган болаларда 7678 нафар;
- 4–6 ёш оралиғида 3184 нафар;
- 7–14 ёшдаги болаларда эса 1998 нафар;
- 15–19 ёшдаги ўсмирлар орасида 756 нафар;
- 20 ва ундан катта ёшдаги фуқаролар орасида эса 4938 нафар бемор аниқланган.
Касалликка нима сабаб бўлади?
Мутахассисларнинг фикрича, ўткир юқумли ичак касалликлари айниқса ёз ойларида кўпроқ учрайди. Бунга бир нечта омиллар сабаб бўлмоқда. Жумладан, яхши сақланмаган ёки узоқ вақт турган овқатларни истеъмол қилиш, болалар учун мўлжалланган сунъий овқатларни тайёрлашда гигиена қоидаларига риоя қилинмаслиги, ювилмаган ҳўл меваларни истеъмол қилиш, очиқ сув ҳавзаларида чўмилиш вақтида микробларнинг организмга тушиши ҳамда ушбу касаллик билан оғриган беморлар билан мулоқотда бўлиш инфекциянинг тарқалиш хавфини оширади.
Шунингдек, сифати кафолатланмаган, носанитария шароитида тайёрланган ва сотилаётган овқатлар, салқин ичимликлар, шарбатлар, айран ва бошқа маҳсулотларни истеъмол қилиш ҳам ўткир ичак инфекцияларининг тарқалишига сабаб бўлиши мумкин.
Санепидқўмита ушбу касалликни олдини олиш учун қайнатилган сув ичишни ва озиқ-овқат маҳсулотларини ювиб истеъмол қилиш, ҳамда шахсий гигиена қоидаларига пухта амал қилишни тавсия қилган.
Жаҳон соғлиқни сақлаш ташкилоти (ЖССТ) маълумотларига кўра, ҳар йили дунё бўйича 1 миллиарддан ортиқ киши диарея билан касалланади, улардан 5–10 миллион нафари вафот этади.
Изоҳ (0)