Туркманистон президенти Қатарга бориб, футбол бўйича жаҳон чемпионати ўйинини томоша қилди

3 декабрь куни Туркманистон президенти Сердар Бердимуҳамедов Қатар амири Шайх Тамим бин Ҳамад Ал Танийнинг таклифи билан Доҳага ташриф буюриб, стадионда футбол бўйича жаҳон чемпионати ўйинини томоша қилди. Бу ҳақда «Хроника Туркменистана» хабар бермоқда.

Туркманистон раҳбарининг Қатар амири билан учрашуви «Халифа» стадионида бўлиб ўтди. Музокаралар тафсилотлари ҳақида хабар берилмади ва фақат мамлакатлар ўртасидаги ҳамкорликни ривожлантириш ҳақидаги умумий иборалар билан чекланилди.

Қатар ОАВлари ҳам ўз репортажлари суҳбат тафсилотларига тўхталмади.

Учрашувдан кейин Бердимуҳамедов фахрий меҳмон сифатида Нидерландия ва АҚШ жамоалари ўртасидаги матчни томоша қилди.

Нашр эслатишича, 30 август куни Қатар ташқи ишлар вазири Муҳаммад бин Абдул Ал-Таний туркманистонлик ҳамкасби Рашид Меридов билан телефон мулоқоти чоғида президент Сердар Бердимуҳамедовни Қатарга таклиф қилганди.

Октябрда эса президент Бердимуҳамедовнинг Қатарга сафари Ашхободда ташқи ишлар вазири ўринбосари Бердиниёз Матиев ва Қатар ишлари бўйича ишончли вакил Муҳаммад Масхал Ал-Отайбий томонидан ҳам муҳокама қилинган.