Россия таркибига кирувчи Доғистон республикасида Каспий денгизи қирғоқлари бўйлаб 2500 та ўлик тюлен топилди. Бу ҳақда ҳудуд Табиий ресурслар ва экология вазирлиги 4 декабрь куни кечқурун хабар берди.
Нобуд бўлган жониворларнинг мурдалари турли жойларда, айниқса, Юзабаш дарёси яқинида ҳамда Сулак ва Шуринка дарёлари этаклари оралиғида аниқланган.
«ТАСС» вазирликка таяниб ёзишича, бу сўнгги ўн йил ичида Каспий нерпалари (тюленлар оиласига мансуб сутемизувчи ҳайвонлар)нинг оммавий нобуд бўлиши билан боғлиқ энг йирик ҳолатдир. Ҳалок бўлган жониворларни ҳисоблаш давом этмоқда.
Бир кун аввал, 3 декабрда, Махачқалада Каспий денгизи соҳилларида 650—700 та ўлик тюлен топилганди. 4 декабрь куни кундузи эса Каспий табиатни муҳофаза қилиш маркази 1700 та тюллен нобуд бўлганини тасдиқлади.
Доғистон Табиий ресурслар ва экология вазирлиги тюленлар ҳалок бўлишининг асосий версияси сифатида «табиий омиллар тан олингани»ни маълум қилди.
Каспий денгизида нерпаларнинг оммавий нобуд бўлиши биринчи марта юз бераётгани йўқ. Бироқ шу пайтгача ҳалок бўлган ҳайвонлар сони унчалик катта бўлмаган: масалан, 2020 йил ноябрида 300 та ўлик жонивор топилган бўлиб, ўшанда денгиз ҳавзасига табиий газ сизиб чиқиши эҳтимолий сабаб сифатида айтилганди.
Изоҳ (0)