Франция президенти Эммануэль Макрон Россия президенти Владимир Путин билан бевосита мулоқот мамлакатлар ўртасидаги ҳамкорликни қайта тиклашда муҳим рол ўйнайди, деб ҳисоблайди. Унинг фикрича, Россия-Украина низоси музокаралар орқали якунланади ва у «бошқа вариантлар»ни кўрмаяпти. Шу билан бирга, унинг фикрича, қарор украиналиклар томонидан қабул қилиниши керак.
«Мен президент Путин билан мунтазам муҳокамалар ва бевосита алоқани қўллаб-қувватлайман, чунки ҳамкорликни қайта тиклашнинг энг яхши усули ушбу тўғридан-тўғри канални сақлаб туришдан иборат деб ҳисоблайман. Изоляция — бу энг ёмон нарса, айниқса, у каби етакчи учун», — деди Макрон CBS каналига берган интервьюсида.
Франция президенти Россия ва Украина вакиллари билан норасмий музокаралар олиб бормаётганини айтди. Унинг сўзларига кўра, «норасмий жараёнларда ҳеч қачон иштирок этмайди» ва доим ўз хатти-ҳаражатлари ҳақида ҳисобот беради. «Ҳар сафар президент Путин билан суҳбатлашганимда, буни умумий ютуқ сифатида қайд этганман», — деди у.
Россия қўшинлари Украинага киришидан аввал ва кейин ҳам Макрон Путин билан кўп марта қўнғироқлашган. Ўтган ҳафта у Россия учун хавфсизлик кафолатлари ҳақида ўйлаб кўришни таклиф қилганди. Унинг фикрича, Украинадаги низо якунлангач, Европа янгиланган хавфсизлик архитектурасини барпо этиши керак бўлади.
Аввалроқ Макрон Украинага қурол етказиб беришда давом этишини айтиб, кесиб ўтилмайдиган маълум қизил чизиқлар ҳам борлигини таъкидлаган эди.
Маълумот ўрнида, Франция Россиянинг Украинадаги «агрессив жиноятлари»ни текшириш бўйича махсус трибунал яратиш устида иш бошлади. Россия Ташқи ишлар вазирлиги эса бундан норозилик билдирди.
Изоҳ (0)