Украинага бостириб кирганидан бери ўтган тўққиз ой ичида Россия урушга 82 миллиард доллар ёки бюджет йиллик даромадларининг чорак қисмини сарфлаган. Украинанинг Forbes нашри ҳисоб-китоблари шундан дарак бермоқда.
Бу рақамлар фақат жанговар ҳаракатларни қўллаб-қувватлаб туриш учун зарур бўлган бевосита харажатларни ўз ичига олади. Мудофаа учун доимий чиқимлар ҳамда Россия иқтисодиётининг уруш ва санкциялар туфайли талафотлари ҳисобга олинмаган.
2021 йилда Россия бюджет даромадларининг барчаси доллар эквивалентида 340 миллиардни ташкил қилган.
Нашр ҳисоб-китоблари бўйича кузда Россия урушга бир ойда камида 10 миллиард доллар сарфлаган — бу истило бошидаги кўрсаткичдан икки марта кўп демакдир. Харажатлар сафарбарликдан кейин кескин ошган, деб ҳисоблайди Forbes — ҳарбий хизматга кўпроқ одамлар чақирилди, шу сабабли урушда қатнашаётганлар учун пул тўловлари, улар учун яроғ-аслаҳа ва қуролга харажатлар, шунингдек, қурбонларнинг оилалари ва жабрланганларга товон пули учун чиқимлар ошиб кетган.
Шунингдек, уруш харажатларининг катта қисми — 14 миллиард доллардан зиёди ракета зарбаларига тўғри келган. Тахминий ҳисоб-китобларга кўра, тўққиз ой мобайнида тўрт мингдан ортиқ ракета учирилган бўлиб, ҳар бирининг ўртача нархи қарийб уч миллион долларга тенг. Артиллерия ўқларига, Forbes фикрича, деярли 5,5 миллиард доллар сарфланган.
Нашр Россия армиясининг техника талафотларини (биринчи ўринда танклар ва самолётлар) 20,8 миллиард долларга баҳолади.
Урушга харажатлар ўсиб бормоқда, аммо Россия бюджетига энергия манбалари сотувидан тушумлар камаймоқда, дейилади нашр хабарида. Таъкидланишича, 2023 йилда Россия бюджети бундай юкламани эплай олмаслиги мумкин.
Украинанинг Forbes нашри ўз ҳисоб-китоблари учун Украина қуролли кучлари бош штабининг Россия армияси техника ва аскарлар бўйича талафотлари, шунингдек, учирилган ракеталар сони ва артиллерия зарбалари шиддати ҳақидаги маълумотларидан фойдаланди.
Изоҳ (0)