Венгрия парламенти Финляндия ва Швециянинг НАТОга кириши ҳақидаги келишувларни 2023 йил бошида ратификация қилмоқчи. Бу ҳақда Венгрия бош вазири Виктор Орбан Польша бош вазири Матеуш Моравецкийга маълум қилган.
«Мен бош вазир Виктор Орбанга Финляндия ва Швециянинг НАТОга аъзо бўлиш имкониятларини имкон қадар тезроқ тасдиқлашни сўраб мурожаат қилдим. Ва парламентнинг келаси йил бошидаги биринчи сессиясида ратификация бўлади, деган ваъдани эшитдим», — деди Моравецкий.
Орбан ҳам Швеция ва Финляндиянинг НАТОга аъзолигини ратификация қилиш масаласи парламентнинг келаси йилги биринчи сессияси кун тартибига қўйилганини тасдиқлади. «Шведлар ва финлар Венгрия туфайли бир дақиқани ҳам йўқотмаган ва йўқотмайди. Венгрия, албатта, уларнинг қўшилиши учун зарур ёрдамни беради», — деб ваъда қилди Венгрия бош вазири.
Ҳозиргача НАТОнинг 28 та давлати Финляндия ва Швециянинг НАТОга қўшилиши ҳақидаги келишувларни ратификация қилган. Фақат Венгрия ва Туркия бунга рухсат бермаган. ОАВнинг ёзишича, Анқара Швецияни альянсга қабул қилиш ҳақидаги аризани катта эҳтимол билан, йил охиригача имзоламайди. Туркия ҳукумати Финляндия ва Швеция Анқарага бирорта ҳам террорчини топширмаганидан шикоят қилганди.
Изоҳ (0)