Қозоғистонда прокуратура талаби билан Жаҳон соғлиқни сақлаш ташкилоти (ЖССТ) сайти блокланди. Бу ҳақда Digital Paradigm жамоат фонди директори Елжан Кабишевга таяниб, «Tengrinews» хабар берди.
«Бироқ ташкилот билдиришнома олмаган. Тасаввур қилинг, Талгар прокурори ЖССТ сайтига кириш имконсиз деб қарор қилди. Бу мен учун чегарадан ўтиш ҳисобланади», — деди Кабишев.
ЖССТ сайти Қозоғистон ҳудудида ишламаётгани ҳақида Facebook’да қозоғистонлик фойдаланувчилар маълумот берган. Соғлиқни сақлаш ва тиббиёт соҳаси мутахассислари ҳам бу ҳақда хабар бермоқда. Суд ташкилот сайти блокланганини тасдиқлаган. Жараённи Олмаота вилояти Талгар туман суди судьяси Н.Б.Сарсенбоев кўриб чиққан.
Таъкидланишича, Талгар тумани прокурори аризачи сифатида давлат манфаатларини кўзлаб иш тутган. Суд қарори 2022 йил 14 октябрда чиқарилган. Прокурор ЖССТ сайтида ўз жонига қасд қилиш усуллари ҳақида маълумотлар борлигини сабаб қилиб кўрсатган.
«Қозоғистонда инсон ва унинг ҳаёти энг олий қадриятлардан бири сифатида эътироф этилишини ҳисобга олиб, тарқатилаётган интернет-ресурсларда инсонни ҳаётдан маҳрум қилиш, жонига қасд қилиш усуллари ҳақида маълумотлар мавжудлиги сабабли прокурорнинг аризаси қаноатлантирилди», дейилади суд қарорида.
Изоҳ (0)