Россия президенти Владимир Путин 25 ноябрь куни Украинадаги урушга сафарбар қилинганларнинг оналари билан учрашув ўтказмоқда. Бу ҳақда «Кремлin.ru» хабар берди.
Маълум қилинишича, учрашув Путиннинг Ново-Огарёводаги қароргоҳида бўлиб ўтмоқда. Кремль матбуот котиби Дмитрий Песков президент ва ҳарбий хизматчиларнинг оналари ўртасида эркин суҳбат ўтказилишини айтган.
«Шуни билишингизни истардимки, шахсан мен ва бутун мамлакат раҳбарияти сизнинг дардингизга шерикмиз. Фарзандидан айрилишни ҳеч қайси ота-она кўтара олмайди. Россия ҳукумати ҳалок бўлган аскарларнинг оналари ўзларини унутилгандай ҳис қилмасликлари учун қўлидан келган ҳамма нарсани қилади. Ҳеч нарса йўқотилган ўғилнинг ўрнини босолмайди», — деди Путин.
Шунингдек, Россия раҳбари уруш майдонидаги ҳарбийларга шахсан ўзи қўнғироқ қилгани ва уларнинг муаммолари билан қизиққанини таъкидлаб, уларни қаҳрамонлар деб атаган.
Ноябрь ойи бошида Путин россияликлар билан учрашиб, сафарбар қилинганлар ҳақида уларнинг фикрларини эшитишга ваъда берган. Песков кейинроқ президент фуқаролар билан алоҳида тадбирда учрашиши ва бу ҳақда Кремль кейинроқ маълум қилишини айтганди.
21-сентябр куни Путин қисман сафарбарлик эълон қилди. 28 октябрь куни мудофаа вазири Сергей Шойгу унинг якунлангани ҳақида маълум қилди. Президентнинг сўзларига кўра, ноябрь ойи бошига қадар мамлакатда 318 минг киши, жумладан, кўнгиллилар сафарбар этилган. Улардан 49 минг нафари жанговар зонада бўлган.
Изоҳ (0)