Буюк Британия ҳукумати биринчи марта Украинага вертолётлар етказиб беришга қарор қилди, шунингдек, улар 10 мингта артиллерия снарядлари партиясини юборади. Бу ҳақда Британия мудофаа вазири Бен Уоллесга таяниб, BBC хабар берди.
Таъкидланишича, гап учта Sea Кинг қидирув-қутқарув вертолётлари ҳақида бормоқда, уларнинг биринчиси аллақачон Украинага етиб келган. Ўтган олти ҳафта давомида Украина экипажлари Буюк Британияда ушбу вертолётларда парвоз қилиш ва уларга хизмат кўрсатиш бўйича тайёргарликдан ўтган.
Sea Кинг вертолётлари Қироллик ҳарбий-ҳаво кучлари ва Қироллик флоти томонидан фойдаланилган. Уларнинг охиргиси 2018 йилда ҳисобдан чиқарилган.
Аввалроқ Буюк Британия Украинага юқори аниқликдаги Brimstone-2 ракеталарини юборгани, модернизация қилинган ракеталар лазерли мўлжалга олиш тизими ва аввалгидан икки марта узоқроққа отилиши билан ажралиб туриши хабар берилган эди.
Буюк Британия бош вазири Риши Сунак ўтган ҳафта Украинага келган эди. Ташрифи чоғида у Киевга ҳаво ҳужумига қарши мудофаа воситаларини, шу жумладан, 125 та зенит қуролларини етказишга ва вайрон бўлган инфратузилмани қайта тиклашда иштирок этишга ваъда берган эди. Британия томонидан тақдим этилган кўмак 2022 йилда аллақачон 3 миллиард фунт стерлингдан ошган.
Изоҳ (0)