Қирғизистон Вазирлар Маҳкамаси раҳбари Оқилбек Жапаров Хитой–Қирғизистон—Ўзбекистон темир йўли қурилишига қанча маблағ кетишини айтди. Бу ҳақда 24.kg хабар берди.
Жапаровга кўра, мамлакатда амалга оширилиши керак бўлган иккита йирик лойиҳа бор. Улардан бири Қамбарота ГЭСи қурилиши бўлиб, 2023 йилда қурилиш ва тайёргарлик ишлари якунланиши кутилмоқда. Иккинчи йирик лойиҳа эса Хитой–Қирғизистон—Ўзбекистон темир йўли қурилиши ҳисобланади.
«Апрель ойида Хитойнинг лойиҳа институти бизга ҳужжатларни тақдим этиши керак. Қурилиш 3 дан 5 миллиард долларгача баҳоланмоқда. Қамбарота ГЭСи лойиҳаси қанчага тушиши ҳозирча номаълум. Лекин унинг нархи темир йўлникига тенг бўлиши кутилмоқда», — дейди Оқилбек Жапаров.
Маълумот ўрнида, октябрь ойида Эрон Хитой—Қирғизистон—Ўзбекистон темир йўлини ўз чегараларигача узайтиришни таклиф қилганди. Қирғизистон бу орқали денгизга чиқиш имкониятига эга бўлиши қайд этилган.
Изоҳ (0)