Мадридда бўлиб ўтаётган НАТО Парламент Ассамблеясида Россия террорчи давлат сифатида тан олинди. Бу ҳақда «Халқ хизматкори» фракцияси халқ депутати, Украинанинг НАТО ассамблеядаги доимий делегацияси раҳбари Егор Чернеев маълум қилди.
Парламент ассамблеясида Россия ҳужумига қарши халқаро трибунал яратиш илгари сурилди.
«НАТОнинг барча 30 та давлати делегациямиз таклифларини қўллаб-қувватлади. Бундай трибунал нафақат ҳарбий жиноятларнинг бевосита айбдорларини, балки Россия олий раҳбариятини ҳам ҳукм қилиш имконини беради. Резолюция НАТОга аъзо барча мамлакатлар ҳукуматлари ва парламентларига юборилади», — деди Егор Чернеев.
Унинг сўзларига кўра, НАТО Парламент ассамблеяси резолюциясида Украина учун бир қанча муҳим қарорлар бор. Улар қуйидагиларни ўз ичига олади:
- Украинага қурол етказиб бериш ҳажмини ошириш;
- Украинанинг НАТОга кириши учун аниқ қадамларни ишлаб чиқиш;
- Украинага етказилган зарар учун Россиядан товон ундириш механизмини яратиш.
18 ноябрь куни Европарламент Россияни «терроризм ҳомийси »деб тан олиш ҳақидаги резолюцияни тайёрлаганди. Европарламент сиёсий гуруҳлари ўртасида тўрт соат давом этган музокаралардан сўнг резолюция матни бўйича келишувга эришилган. Европарламент кун тартиби бўйича резолюцияга овоз бериш 23 ноябрга белгиланган.
Изоҳ (0)