Хитойда коронавирус билан боғлиқ эпидемиологик вазият оғирлашмоқда

Хитой пойтахти Пекинда коронавирусга чалинишлар сони ортиши фонида мураккаб эпидемиологик вазият юзага келди. Бу ҳақда «РИА Новости» хабар берди.

Пекин ҳукумати матбуот котиби Су Хесзяннинг сўзларига кўра, шаҳарда пандемияга қарши кураш «танқидий босқичда».

«Пойтахтда коронавирусга чалиниш кўрсаткичи ошмоқда, аҳоли орасида касаллик кенг тарқалмоқда. Эпидемиянинг олдини олиш ва назорат қилиш ишлари эса танқидий даржада», — деди Сю Хесзян.

Таъкидланишича, ҳозирда устувор вазифа пойтахтнинг энг зич ҳудудларидан бири бўлган Чаоянг туманида эпидемияга қарши курашиш ҳисобланади. Пекинда 20 ноябрь, якшанба куни 154 та маҳаллий, шунингдек, 808 та симптомсиз коронавирус ҳолати аниқланди. Пойтахтдаги эпидемиологик вазият ноябрь ойи бошидан аста-секин ёмонлаша бошлади. 22 ноябрдан Пекин ҳукумати мамлакатнинг бошқа минтақаларидан шаҳарга кириш қоидаларини кучайтиради. Сешанба кунидан бошлаб Пекинга келганлар уч кун ичида учта ПЗР тестини топшириши керак бўлади.

Хитойда май ойидан бери биринчи марта ноябрь ойида коронавирус билан оғриган бемор вафот этди. Коронавирусга чалинган 87 ёшли эркак 19 ноябрь куни Пекинда вафот этган. Ташхис 11 ноябрь куни қўйилган, ўша пайтда уни қуруқ йўтал безовта қилаётган. Икки кундан кейин унга пневмония ташхиси қўйилган. 19 ноябрга келиб, бу ўпкада оғир бактериал инфекцияга айланган ва эркак септик шокка тушган.