НАТО бош котиби Путиннинг иккита стратегик хатосини айтди

НАТО бош котиби Йенс Столтенберг Мадридда бўлиб ўтаётган Парламент ассамблеясида Россия президенти Владимир Путин йўл қўйган иккита стратегик хатони айтди. Бу ҳақда El Pais хабар берди.

Столтенбергнинг фикрича, Путин Украина халқининг жасорати ва Шимолий Атлантика альянси бирлигини паст баҳолаб, стратегик хатога йўл қўйди. НАТО бош котиби узоқ уришга тайёр бўлиш кераклиги ҳақида огоҳлантирди. У Россия президенти ҳарбий амалиётда муваффақиятсизликка учраганига қарамай, Россиянинг ҳарбий қудратини паст баҳолаш хато ҳисобланишини таъкидлади.

«Украинани узоқ вақт давомида қўллаб-қувватлашга тайёр бўлишимиз керак. Демократик давлатлар вақт ўтиши билан ўз саъй-ҳаракатларини сақлаб қола олмайди, деб ўйлай олмаймиз», — дейди НАТО бош котиби.

Столтенберг уруш музокаралар столида якунланишини табиий эканини айтди. Агар Украина учун мақбул натижага эришиш керак бўлса, Киевни қўллаб-қувватлашни ошириш зарурлигини қайд этди.

«Биз музокараларга интиламиз, лекин куч ишлатишнинг шафқатсизлиги ғалабасини англатувчи натижани хоҳламаймиз. Путин ғалаба қозона олмайди, акс ҳолда бу фалокат бўлади», — дея қўшимча қилди у.

Аввалроқ, НАТО бош котиби Россия қўшинларининг Херсондан чекиниши Украина учун яна бир ғалаба ҳисобланишини маълум қилганди.