Эрон полицияси мамлакатда бўлиб ўтаётган норозилик ҳаракатлари билан бирдамлигини намойиш этиб, омма олдида ўз рўмолларини ечиб ташлаган икки нафар машҳур актрисани ҳибсга олди, деб хабар беради The Times of Israel.
Ҳенгамеҳ Газионий ва Катаюн Риёҳий дастлаб ижтимоий тармоқлардаги «провокацион» постлари ва ОАВлардаги фаолиятининг текширилиши юзасидан прокуратурага чақирилган, сўнг ҳибсга олинган. Намойишларнинг бостирилишини ашаддий танқид қилиб келган Газионий тартибсизликларга гиж-гижлагани ва уларни қўллаб-қувватлагани, шунингдек, мухолифат ОАВлари билан алоқаси учун қўлга олинган.
52 ёшли кино юлдузи суд органларига чақирилганини маълум қилди, сўнг Instagram’га ўзининг ҳижобини ечаётгани акс этган видеони эълон қилди.
«Катта эҳтимол билан бу менинг сўнгги постим бўлади. Мана шу лаҳзадан бошлаб мен билан нимаики содир бўлмасин, билингки, доимгидек сўнгги нафасимгача Эрон халқи биланман», — деб ёзди у 19 ноябрь куни кечқурун.
Ундан олдинги ҳафта эълон қилган постида у Эрон ҳукуматини 50 дан ортиқ болаларнинг ўлимида айблаган эди.
Кейинроқ 60 ёшли кино ва телевидение актрисаси, бир қанча мукофотлар совриндори ҳамда хайрия фаолияти билан машҳур бўлган яна бир актриса Катаюн Риоҳий худди шу иш бўйича ҳибсга олинди. У сентябрда ҳижоб тақмаган ҳолда Лондоннинг Халқаро Эрон телевидениесига интервью берганди. Актриса Маҳса Аминийнинг ўлимидан кейин Эронни қамраб олган норозилик намойишлари билан бирдамлигини билдирган, шунингдек, мажбурий ҳижобга қарши чиққан эди.
Mizan Online маълумотларига кўра, Газионий ижтимоий тармоқларга жойланган «провокацион» материаллари учун прокурорлар томонидан судга чақирилган саккиз кишидан бири бўлган. Улар орасида эронлик футболчи ва Теҳроннинг Персеполис футбол клуби мураббийи Яҳё Гулмуҳаммад ҳам бўлиб, у Эрон миллий термаси ўйинчиларини «эзилган халқнинг овозини ҳукуматга етказмаётганликда» айблаган эди.
Эрондаги намойишларга нима сабаб бўлди?
Эронда намойишлар сентябрь ўрталарида, 22 ёшли Маҳса Аминийнинг ўлимидан кейин бошланди. Полиция уни Теҳронда метродан чиқиш чоғида ҳижобни нотўғри ўрагани учун ҳибсга олган.
Кейинроқ Аминийнинг акаси маълум қилишича, полициячилар у билан «қайта тарбиялаш» ишларини ўтказишга ваъда берган. Полиция участкасидан қиз тез ёрдам машинасида олиб кетилган. Шифокорлар қизда юрак хуружи ва инсульт юз берганини билдирган, у бир неча кундан кейин вафот этган. Эрон полицияси бахтсиз ҳодиса юз берганини даъво қилмоқда.
Эрон ҳукумати фикрича, норозиликлар «ислом режимини заифлаштириш бўйича душман стратегияси»нинг бир қисмидир, мамлакат армияси эса намойишлар фонида «душманларга қарши курашиш» ва хавфсизликни таъминлаш ниятида.
Эрон олий етакчиси Али Хоманаий намойишлар «оддий эронликлар» томонидан ўтказилмаётганини, балки олдиндан режалаштирилганини айтганди, шунингдек, у АҚШ ва Исроилни тартибсизликларни ташкиллаштиришда айблаганди.
Мавзуга доир:
Изоҳ (0)