Қозоғистоннинг «Байтерек» холдинги раҳбари Канат Шарлапаев Россия фуқаролигидан чиқиш ҳақида ариза берди. У Владимир Путиннинг тегишли фармони билан қаноатлантирилди, деб ёзади «Коммерсантъ».
«Байтерек» — Қозоғистон ҳукуматининг асосий молиявий институти. Холдинг ўз шўъба ташкилотлари орқали давлат ва ҳукумат дастурлари ҳамда «100 та муайян қадам» миллий режасини амалга оширишда асосий оператор ҳисобланади.
Шарлапаев Россияда туғилган ва автоматик равишда у ернинг фуқаролигини олган. «1981 йил 9 июлда Саратов вилоятида туғилган Шарлапаев Канат Бисимбаевич ва унинг 2017 йил 5 апрелда Москвада туғилган қизи Шарлапаева Дана Канаткизининг Россия фуқаролигидан чиқиш ҳақидаги аризаси қаноатлантирилсин», — дейилади 18 ноябрги фармон матнида. Унда фуқароликдан воз кечиш сабаблари келтирилмаган.
Яна қайси бизнесменлар Россия фуқаролигидан воз кечган?
Ноябрь бошида бизнесмен Олег Тинков Россия паспортидан воз кечиши ҳақида ижтимоий тармоқлар орқали маълум қилди. Ўз хатти-ҳаракатини у урушга қарши эканлиги билан изоҳлади. «Бундай паспортим бўлишидан уяламан», — деб ёзди у.31 октябрь куни Револут банк сервисига асос солган бизнесмен Николай Сторонский Россия фуқаролигидан воз кечгани хабар берилганди. The Telegraph ёзишича, Револут вакиллари Сторонскийнинг РФ фуқаролигидан воз кечиши Украинадаги уруш билан боғлиқлигини билдирган ҳолда, бизнесмен «қатъиян жанговар ҳаракатларни зудлик билан тўхтатишга чақириши»ни таъкидлаган.
Аввалроқ тадбиркор ва инвестор, ДСТ Глобал инвестициявий фонди эгаси миллиардер Юрий Милнер Россия фуқаролигидан воз кечгани маълум бўлганди.
Сентябрь бошида россиялик ва арманистонлик тадбиркор ва инвестор Рубен Варданян Россия фуқаролигидан воз кечиб, тан олинмаган Тоғли Қорабоғ Республикасига кўчиб ўтганини маълум қилганди.
Шунингдек, июнь ойида Freedom Finance сармоя компанияси асосчиси Тимур Турлов Россия фуқаролигидан воз кечиб, Қозоғистон паспортини олганини маълум қилганди.
2022 йил апрелида Россияга алоқадор бўлган бир қатор тадбиркорлар Forbes журналига мурожаат қилиб, уларни «россиялик бизнесменлар» деб атамасликни сўраган. Улар орасида Николай Сторонский ва Юрий Милнер ҳам бўлган.
Изоҳ (0)