Украина мамлакатни қайта қуриш ва украиналикларни ватанга қайтариш бўйича ижтимоий дастурларни амалга ошириш учун ҳамкорлардан қўллаб-қувватлов кутмоқда, бироқ ҳарбий ҳаракатлар туфайли меҳнат бозори қуламоқда. Бу ҳақда Украина иқтисодиёт вазири ўринбосари Татяна Бережная Польша—Украина иқтисодий форумида айтиб ўтди.
«Жанглар 10 миллион одам иш билан банд ҳудудларда кечмоқда. Камида 5 миллион киши ишсиз қолди. Жангларда юзлаб ишчилар ҳалок бўлди. Уруш туфайли 7 миллионга яқин одам аллақачон мамлакатни тарк этган. Ишсизлик даражаси сезиларли даражада ошди », — деди у.
Бережнаянинг таъкидлашича, Украина ҳукумати меҳнат бозори ва умуман иқтисодиётни барқарорлаштириш учун бир нечта дастурларни ишга туширган: бизнес учун қулай кредит ва грантларни қўллаб-қувватлаш, корхоналарни «хавфли ҳудудлардан нисбатан хавфсиз ҳудудларга» кўчириш ва ишсизларни жамоат ишларига жалб қилиш.
Бережнаянинг қайд этишича, Украина расмийлари ҳарбий ҳаракатлар туфайли мамлакатни тарк этган барча фуқароларни қайтаришга қарор қилган.
Октябрь ойи охирида Украина расмийлари шахсий гувоҳномаларини йўқотган фуқароларнинг мамлакатга қайтишига ёрдам берадиган махсус сертификатни жорий қилди. Украина бош вазири Денис Шмигал Киев украиналикларни ватанга қайтариш учун ҳамма нарсани қилишга ваъда берди. Ҳужжат йил давомида тажриба доирасида чиқарилади, дея тушунтирди ҳукуматнинг Олий Рададаги доимий вакили Тарас Мелничук.
Изоҳ (0)