Politico Европа Иттифоқи ва АҚШ ўртасида савдо урушини прогноз қилди

АҚШда 1 январдан инфляцияни пасайтириш тўғрисидаги қонуни кучга киради. Европа бу қонунга «жавоб беришга» жиддий тайёргарлик кўрмоқда. Европаликлар кўриб чиқаётган чоралар трансатлантик савдо урушига олиб келиши мумкин. Бу ҳақда Politico хабар бермоқда.

Нашрга кўра, Европа, хусусан, Германиянинг ҳам «Вашингтон тинчлик келишувини таклиф қилмаётганидан ҳафсаласи пир бўлган».

Европанинг қўрқуви 1 январдан кучга кирадиган АҚШда яшил бизнесни қўллаб-қувватлаш учун 369 миллиард долларлик субсидиялар ва солиқ имтиёзлари пакетидан келиб чиқди.

Август ойида АҚШ президенти Жо Байден инфляцияни пасайтириш бўйича қонунни имзолади. Унда солиқларни камайтириш, АҚШда очилган корхоналар учун энергия таъминоти соҳасида имтиёзлар назарда тутилган.

Politico’нинг таъкидлашича, Европаликлар учун муаммо шундаки, АҚШ схемаси компанияларни Европадаги сармояларини кўчиришга ундайди.

Бу эса Франция ва Германия каби Европа Иттифоқининг йирик автомобиль ишлаб чиқарувчиларига муаммо туғдиради, чунки у электр транспорт воситаларини сотиб олишда мижозларни Америка маҳсулотларини харид қилишга ундайди.

Германия «очиқ хавотир ҳолатида» бўлиб, унинг бир қанча етакчи компаниялари энергия нархининг кўтарилиши шароитида бошқа мамлакатларга сармоя киритиш мақсадида ички операцияларини тўхтатмоқда.

Аммо сулҳ бўлиши даргумон. Агар кураш назоратдан чиқиб кетса, бу қамалда қолган европаликларни даҳшатга соладиган савдо урушига олиб келади, — дейилади хабарда.

АҚШ қонунларига жавобан Европада кўриб чиқилаётган мумкин бўлган ҳаракатлар ЖСТдаги «асосан рамзий» норозилик бўлиши мумкин.

Аммо тўқнашув осонгина АҚШнинг собиқ президенти Дональд Трамп давридаги тарифлар бўйича жангларга қайтиши мумкин, — дейилади прогнозда.

Европада ҳам Қўшма Штатлар билан очиқ тариф уруши ўрнига «эркин савдо қоидаларининг классик тўпламини бузиш ва Вашингтон билан ўз ўйинини ўйнаш» варианти тобора кўпроқ муҳокама қилинмоқда.

Бу қуёш панеллари, аккумуляторлар ишлаб чиқариш каби тармоқлари, водород технологияларини ривожлантиришни фаоллаштириш мақсадида Европа саноатига давлат сармоясини киритишни назарда тутади.