Зимбабведа 280,4 фоиз: Дунё мамлакатларида нархлар қанчалик тез ўсмоқда?

Дунё бўйлаб сентябрь ойида йиллик инфляция Зимбабве, Ливан, Венесуэла ва Суданда энг юқори бўлган. Бу ҳақда «РИА Новости» хабар бермоқда. 

Тадқиқот агентлик томонидан 193 мамлакат миллий статистика хизматлари маълумотлари асосида ўтказилди. 

Таъкидланишича, сентябрда дунёдаги энг юқори инфляция Зимбабведа қайд этилган — 280,4 фоиз. Мамлакатда нархлар ошиши қиш охиридан бошлаб тезлаша бошлади ва сентябргача у 4,6 баробар ошди.

Судан 107 фоиз билан Африка минтақасида иккинчи ва дунё миқёсида тўртинчи ўринни эгаллади. Учинчи ўринда 37,2 фоиз кўрсаткич билан Гана кўрсатилган. 

Дунёда иккинчи, Яқин Шарқ ва Шимолий Африка мамлакатлари орасида биринчи ўрин Ливанга тегишли бўлиб, у ерда инфляция 162,47 фоизга етди. Бироқ мамлакатда йил бошидан буён нархлар ошиши 1,4 баравар секинлашган. 

Бундан ташқари, ушбу минтақада нархларнинг сезиларли ўсиши Туркия (83,5 фоиз) ва Мисрда (15,02) кузатилган.

Жанубий Америкада Венесуэла кўп йиллар давомида юқори инфляциядан азият чекмоқда. 157,4 фоизлик кўрсаткич билан у дунёда учинчи ўринни эгаллаб турибди. Шунга қарамай, мамлакатда инфляция ўтган йил охиридан буён 4,4 баравар пасайган. 

Жанубий Америкада иккинчи ўринда Аргентина туради, у ерда куз бошида нархларнинг ўсиши 83 фоизгача тезлашди, Суринам эса 41,4 фоиз кўрсаткич билан учинчи ўринда.

Шимолий Америкада Куба 37,24 фоиз инфляция билан етакчилик қилди, Никарагуа 11,52 фоиз ва Коста-Рика 10,37 фоиз.

Европа қитъасида сентябрь ойида энг юқори инфляция Молдовада қайд этилган — 34 фоиз. Иккинчи ўринни Украина (24,6 фоиз) эгаллаган бўлса, учинчи ўринда Литва қайд этилган — 24,1 фоиз.  

Осиёда нархлар сентябрь ойида Шри-Ланкада 73,7 фоиз, Лаосда 34 фоиз ва Покистонда 23,2 фоиз билан энг кўп кўтарилган. 

Океания мамлакатлари орасида инфляция энг юқори Тонга қироллигида — 14 фоиз, Самоада — 11 фоиз ва Палауда — 10,3 фоиз.

Ўзбекистонда сентябрь ойида йиллик инфляция 12,2 фоизни ташкил қилган. Октябрда ҳам бу кўрсаткич ўзгармаган.