«Дунё раҳмат айтмайди»: БМТнинг иқлим саммити якуний баёнотини эълон қилди

Бирлашган Миллатлар Ташкилотининг (БМТ) COP27 иқлим конференцияси иштирокчилари иқлим ўзгариши таъсиридан жабр кўрган заиф мамлакатларга ёрдам бериш учун жамғарма ташкил этишга келишиб олди. 

Мисрнинг Шарм аш-Шайх шаҳрида бўлиб ўтган саммитнинг якуний баёноти БМТ иқлим котибиятининг расмий сайтида эълон қилинди.

Ушбу анжуманда адолат йўлида муҳим қадам қўйилди. Мен йўқотишлар ва зарарларни қоплаш учун жамғарма ташкил этиш қарорини олқишлайман, — деди БМТ Бош котиби Антониу Гутерриш делегатларга йўллаган видеомурожаатида. Унинг сўзлари БМТ сайтидаги хабарда келтирилган.

Шунингдек, конференция иштирокчилари жамғармани ким молиялаштириши ва бу маблағлардан қайси давлатлар фойдаланиши мумкинлиги борасида келиша олмагани қайд этилган. Ушбу муаммонинг ечими «кейинги муҳокамалар учун мавзу бўлиб қолди», дейилади хабарда.

COP27 иштирокчилари қазиб олинадиган ёнилғиларни босқичма-босқич тўхтатиш ва глобал исишни 1,5 градус даражасида ушлаб туриш зарурлиги каби бир қатор бошқа муҳим масалаларда бирлаша олмади. 

Камбағал мамлакатларга ёрдам бериш учун жамғарма яратиш қарори бузилган ишончни тиклаш учун зарур бўлган ўта муҳим сиёсий сигнал, аммо иқлим муаммосини ҳал қилиш учун бу етарли бўлмайди. Биз ҳозир эмиссияни кескин камайтиришимиз керак — аммо конференция бу саволга жавоб топа олмади, — деди Гутерриш.

COP27 натижаларидан Европа комиссияси раиси ўринбосари Франц Тиммерманс ҳафласи пир бўлганини очиқчасига айтиб ўтди. 

Биз қилаётган ишлар одамлар ва сайёра учун етарли қадам эмас. Кўплаб давлатлар жасорат билан глобал исишни секинлаштиришга рози бўлмади. Дунё бизга раҳмат айтмайди, — дейди Тиммерманс.  

Унинг сўзларига кўра, агар дунё углерод чиқиндиларини кескин қисқартиришни бошламаса, янги жамғарма бартараф этиши керак бўлган иқлим офатларидан зарар ва йўқотишлар ошади. 

Биз Глазгодаги конференциядан кейин анча секинлашдик. Халқимиз ва сайёрамиз учун беҳуда вақт йўқ, — дея хулоса қилди Франц Тиммерманс.

БМТнинг сўнгги йирик иқлим конференцияси 2021 йилнинг ноябрь ойида Шотландиянинг Глазго шаҳрида бўлиб ўтганди.

Унинг аъзолари глобал ҳароратни 1,5 гардусдан ортиқ кўтармасликка келишиб олганди. Шундан сўнг экспертлар ва экологлар қабул қилинган қарорлар иқлим ўзгаришининг олдини олиш учун етарли эмаслигини таъкидлади.