Республикачилар АҚШ Украинага ёрдам учун юборган «ҳар бир доллар»нинг текширилишини талаб қилди

АҚШ Конгрессининг Вакиллар палатасидаги республикачилар Украинани қўллаб-қувватлаш учун ажратилган маблағларни текшириш бўйича резолюция тақдим қилди. Бу ҳақда Конгресс қуйи палатаси аъзоси Маржори Тэйлор Грин матбуот анжуманида айтиб ўтди.

«Бугун мен АҚШ президентига сўров юборишни ҳамда Мудофаа вазири ва Давлат котибининг 2022 йил 15 ноябргача Украинага ажратилган маблағлар бўйича Вакиллар палатасига тегишли ҳужжатларни тақдим этиши кераклигини назарда тутувчи резолюция киритяпман», — деди Грин.

Республикачилар партияси вакили Украина Американинг 51-штати эмаслигини таъкидлади. Уни қўллаб-қувватлаш учун юборилган америкалик солиқ тўловчиларнинг пулларини эса, дипломатнинг сўзларига кўра, АҚШ жанубий чегараси ҳимоясини кучайтиришга сарфлаш мумкин эди.

Бундан ташқари, Грин жараён шаффоф эмаслиги туфайли Демократик партия пулнинг бир қисмини ўз кампаниялари учун ишлатиши мумкинлигини тахмин қилиб, маблағлар айнан қандай сарфланаётгани номаълумлигини таъкидлади.

«Биз америкалик солиқ тўловчиларнинг Украинага юборилган ҳар бир долларини текширишимиз керак. Америка халқи ўз пуллари нимага сарфланаётганини билишга лойиқ», — деб ёзди республикачи Twitter’да.

Энди резолюция масъул қўмита томонидан икки ҳафта ичида кўриб чиқилиши керак, шундан сўнг у Конгрессга овоз бериш учун юборилади. The Hill нашрининг ёзишича, ҳозир демократлар ҳужжатни рад этиши мумкин, бироқ Грин агар шундай бўлса, парламент қуйи палатасида кўпчиликни ташкил қилаётган республикачилар резолюцияни қайта киритиши ҳақида огоҳлантирди.

Уруш бошланганидан бери АҚШ Конгресси Украинани қўллаб-қувватлаш учун 65 миллиард доллардан ортиқ маблағ юборди. Ноябрь ойи ўрталарида президент Жо Байден маъмурияти Конгрессдан яна 37 миллиард сўраган.

Республикачилар партияси 2022 йил ноябрида Конгресс қуйи палатасида кўпчиликни қўлга киритди, энди 2023 йилдан бошлаб республикачилар президент маъмуриятининг кун тартибига таъсир ўтказиши мумкин бўлади. Демократлар сўнгги икки йил давомида парламентнинг ҳар икки палатасини назорат қилиб келган. Конгрессдаги кучларнинг янги бирлашуви Украинага ёрдам ажратишга таъсир қилиши мумкин.