АҚШнинг Синсинатти шаҳрида Федерал суд 42 ёшли Хитой фуқароси Сюй Янсзюнни жосуслик қилгани ва Америка авиация компанияларидан тижорий сирларни ўғирлашга урингани учун 20 йиллик қамоққа ҳукм қилди. Бу ҳақда АҚШ Адлия вазирлиги хабар бермоқда.
«Бугунги ҳукм ушбу жиноятларнинг жиддийлигини ҳамда Адлия вазирлигининг Хитой ёки бошқа ҳар қандай чет мамлакат ҳукуматининг иқтисодий ва миллий хавфсизлигимиз учун хавф яратишга қаратилган хатти-ҳаракатларини текширишга қатъий ёндашишини кўрсатади», — деди АҚШ бош прокурори Меррик Гарланд.
Даъво қилинишича, Сюй Янсзюн — Хитой Давлат хавфсизлиги вазирлиги разведка бошқармасининг амалдаги офицери. У 2013—2018 йилларда тахаллуслардан ва сохта компаниялардан фойдаланиб, Американинг етакчи авиация компанияларидан маълумотларни ўғирлаган.
Сюй Янсзюн 2018 йилда Бельгияда қўлга олинган. Ноябрь бошида суд уни иқтисодий жосусликни амалга ошириш мақсадида тил бириктириш, тижорий сирни ўғирлаш мақсадида тил бириктириш, иқтисодий жосусликка уриниш ва тижорий сирларни ўғирлашга уриниш каби барча айблов бандлари бўйича айбдор деб топди.
Изоҳ (0)