Россия Хавфсизлик кенгаши раиси ўринбосари Дмитрий Медведев фикрича, АҚШ Украинага ҳарбий ёрдам беришдан тўхтайди, ахир «Америка доим ўз дўстларини ташлаб кетган». Бу ҳақда у ўз Telegram-каналида ёзди. Унинг сўзларига кўра, Киев ёрдам тўхтатилиши эҳтимолини ҳисобга олиб, «воқеликни ҳис қилиш қобилиятини йўқотди» ва «жазаваси тутиб, Россияга қарши янги санкцияларни талаб қилмоқда».
Медведев фикрича, Украинани қўллаб-қувватлаш учун пул маблағларини ажратиш мавзуси АҚШ учун «кескин ва оғир мавзу»га айланиб бормоқда. Унинг сўзларига кўра, конгрессменлар улкан миқдордаги пул қаерга кетгани юзасидан катта текширув ўтказилишини талаб қилмоқда.
«Бу нарса муқаррар эди, сиёсий жанрдаги қонунлар шунақа. Сайловлардан кейин кучайган республикачилар демократлар устига катта тўлқинни ёғдирмоқда. Демократлар қарши ҳужумга ўтмоқда. Саробга ишонманг, Украина режимини ҳарбийлаштиришга бундан кейин ҳам катта маблағ ажратилаверади. Бу Америка сиёсий элиталаридаги русофобия консенсусининг таркибий қисмидир», — деб ёзди у.
Шу билан бирга, унинг айтишича, вақт ўтиши билан, Вашингтон томонидан Киевнинг қўллаб-қувватланишига айнан Америка фуқаролари қарши чиқади. «Конгрессда Украинадаги националистик режимни орқа-ўнгига қарамасдан қўллаб-қувватлаш тўхтатилмагунича бу таъсир тўпланиб бораверади. Лекин шундай бўлади. Америка доим ўзининг дўстларини ташлаб кетган. Эртами, кечми, бу сафар ҳам шундай бўлади», — деган фикрда Хавфсизлик кенгаши раиси ўринбосари.
Дмитрий Медведев хулоса сифатида аниқлик киритишича, Украина ҳарбий кўмак тўхтатилиши эҳтимолини англаяпти, шунинг учун Киев Ғарбдан каттароқ миқдорда пул ва Россияга қарши янгидан-янги санкцияларни талаб қилмоқда.
Ҳарбий операция бошланганидан буён АҚШ Украинага 18,2 миллиард долларлик қурол-яроғ ва бошқа ускуналарни ажратди. 4 ноябрь куни Пентагон Украинага 400 миллион долларлик янги ҳарбий ёрдам пакети берилишини эълон қилди. 15 ноябрь куни АҚШ президенти Жо Байден Конгрессга Украинага 37,7 миллиард доллар миқдорида қўшимча маблағ ажратиш сўровини киритди.
Вакиллар палатасида кўпчилик ўринни қўлга киритган Республикачилар партияси Украинага юборилаётган маблағларни текширишга чақирди. Бироқ ташқи ишлар бўйича қўмита раҳабри Майкл Макколнинг сўзларига кўра, республикачилар Киевга ёрдам берилишини тўхтатишни режалаштирмаяпти, балки шунчаки уни қатъийроқ назорат қилмоқчи.
Изоҳ (0)