Анқаранинг АҚШдан F-16 қирувчи самолётларини сотиб олиши билан боғлиқ муаммолар яқин орада ҳал бўлади. Бу ҳақда Туркия президенти Ражаб Тоййиб Эрдўғон Индонезияда бўлиб ўтган G20 саммити доирасида АҚШ президенти Жо Байден билан учрашувдан сўнг маълум қилди, деб ёзмоқда Anadolu.
Эрдўғоннинг сўзларига кўра, Байден унга бу масалада «вазият ижобий» эканини айтган.
«Умид қиламанки, ташқи ишлар ва мудофаа вазирларимиз ушбу жараённи яқиндан кузатиб бориши билан биз F-16 муаммосини тез орада ҳал қиламиз», — деди Туркия раҳбари.
АҚШ ва Туркия раҳбарларининг учрашувида икки томонлама муносабатлар, савдо ва хавфсизлик масалалари ҳам муҳокама қилинган.
Сентябрь ойи охирида Туркиянинг ҳукмрон партияси аъзоларидан иборат делегация АҚШдан F-16 сотиб олиш бўйича музокаралар олиб бориш учун Вашингтонга борган эди. Шу билан бирга, Эрдўғоннинг матбуот котиби Иброҳим Калин агар АҚШ F-16 самолётларини сотишдан бош тортса, Анқара Британиянинг Eurofighter Typhoon самолётларини харид қилиши мумкинлиги ҳақида айтганди.
Август ойида Анқара Вашингтондан F-16 қирувчи самолётларининг хариди масаласини тезроқ ҳал этишни талаб қилган. Туркия 40 та F-16 қирувчи самолётини сотиб олмоқчи ва мамлакат армиясида ишлатилаётган 80 та шундай қирувчини модернизация қилмоқчи.
Изоҳ (0)