Шимолий Корея Корея ярим оролидан шарққа қарата катта масофали баллистик ракета учирди. Бу ҳақда Yonhap агентлиги Штаб бошлиқлари бирлашган қўмитасига таяниб хабар бермоқда.
Ҳарбийлар тахмин қилишича, гап қитъалараро баллистик ракета ҳақида бораётган бўлиши мумкин. Айни пайтда мутахассислар унинг парвози параметрларини таҳлил қилмоқда: ракета турини аниқлаш учун парвоз масофаси, баландлиги ва тезлиги ўлчаниши керак.
КХДР ракета учиргани ҳақида Япония Мудофаа вазирлиги ҳам хабар берди. Ҳарбийлар парвоз ҳақида маҳаллий вақт билан тахминан 10:14 да (Тошкент вақти билан 6:14) хабар берган. Идора ҳам унинг қитъалараро ракета бўлганини тахмин қилмоқда. Вазирлик маълумотларига кўра, снаряд Корея ярим оролининг ғарбий соҳилларидан учирилган ва Япония иқтисодий зонасига — Хоккайдо оролидан ғарбга, денгизга келиб тушган.
«Яна бир марта қатъиян таъкидлайман: бу мутлақо номақбул», — дея ҳодисага изоҳ берди Япония бош вазири Фумио Кисида.
Бу йил бошидан буён КХДР томонидан 34 марта ракета учирилишидир.
Шимолий Корея кетма-кет икки кундан буён баллистик ракеталар учирмоқда. Бир кун аввал ҳам КХДР ҳарбийлари Япон денгизига қарата снаряд отганди. Шу куниёқ Жанубий Корея ва АҚШ Мудофаа вазирликлари ракетага қарши мудофаа бўйича маслаҳатлашувлар ўтказди. Кейинроқ унинг қисқа масофали ракета бўлгани, у 240 км масофани босиб ўтиб, 45 км баландликка учгани маълум бўлди.
КХДР Ташқи ишлар вазири Чве Сон Хи аввалроқ агар АҚШ ўз иттифоқчиларининг Шимолий Кореяга нисбатан тийиб туриш қобилиятларини кучайтиришда давом этадиган бўлса, Пхеньян «янада шафқатсизроқ» ҳарбий ҳаракатларни қўллаши ҳақида огоҳлантирганди. У АҚШ, Жанубий Корея ва Япония раҳбарлари Камбоджадаги Шарқий Осиё саммитида уч томонлама учрашув ўтказиб, қарши туриш чораларини муҳокама қилганига эътибор қаратди.
АҚШ ва Жанубий Корея президентлари Жо Байден ва Юн Сок Ёл ҳамда Япония бош вазири Фумио Кисида саммитда 13 ноябрь куни учрашиб, Шимолий Кореянинг ракета парвозларига биргаликда жавоб қилишга келишиб олганди.
Изоҳ (0)