AQSH harbiy yordam doirasida Ukrainaga yetkazib berishni va’da qilgan ba’zi qurol-yarog‘ va o‘q-dorilar zaxiralarining kamayishi muammosiga duch keldi. Bu haqda CNN hukumatdagi bir nechta manbalariga tayanib xabar berdi.
Xususan, gap 155 millimetrli artilleriya o‘q-dorilari va Stinger ko‘chma zenit-raketa majmualari haqida bormoqda. Shuningdek, CNN manbalari fikricha, Ukrainaga va’da qilingan boshqa qurol-yarog‘larni ishlab chiqarish bilan bog‘liq qiyinchiliklar ham yuzaga kelishi mumkin, masalan, Javelin tankka qarshi ko‘chma raketa majmualari hamda HARM va GMLRS raketalari.
Hozircha zaxiralari qisqarib ketgan qurollar va o‘q-dorilar ishlab chiqarishni tezkorlik bilan yo‘lga qo‘yish, shuningdek, ularni Yevropadagi ittifoqdoshlaridan so‘rash imkoniyati bo‘lmayapti.
Shu bilan birga, AQSH hukumati hech qanday sharoitlarda mamlakat xavfsizligi tahdidga yuz tutmasligini hamda qurol yetkazib berishda buning AQSH strategik zaxiralariga va mudofaa rejalariga ta’siri hisobga olinishini ta’kidlamoqda.
Ukrainada urush boshlanishidan oldin, deb yozadi CNN, AQSH ko‘p yillardan buyon birinchi marta hech qanday qurolli nizoga aralashmayotgan edi — o‘sha paytda Afg‘oniston va Iroqdagi qo‘shinlar allaqachon olib ketilgan edi, katta ko‘lamli urushda ishtirok etish uchun qurol ishlab chiqarish zaruriyati esa bo‘lmagan.
“Bu tobora qiyin bo‘lib bormoqda”, — deya CNN’ga ma’lum qildi razvedka bo‘yicha qo‘mita a’zosi kongressmen Mayk Kuigli Ukrainaga qurol yetkazib berishni izohlar ekan. “Bu urush bir necha kunda tugaydi, deb o‘ylagandik, endi esa bir necha yillar davom etishi mumkin. Global yetkazib berishlar zanjiri uzilayotgan bir paytda, G‘arb bunday yuqori darajadagi ehtiyojlarni qondirishga juda qiynaladi”, — dedi u.
O‘z navbatida Pentagon matbuot kotibi Patrik Rayder CNN’ni ishontirishicha, AQSH Ukrainani “qancha talab etilsa, shuncha” qo‘llab-quvvatlashda davom etadi. Ukrainaga qurol yetkazib berish hech ham AQSHning mudofaa qobiliyatini pasaytirmaydi, deya qo‘shib qo‘ydi u.
AQSH — Ukrainaning asosiy ittifoqchilaridan biri. Urush boshlanganidan ekyin Amerika Ukrainaga bir necha marta ko‘p milliardlik harbiy yordam paketlarini ajratdi, shuningdek, u uchun ijara yoki uzoq vaqt bo‘lib-bo‘lib to‘lash sharti bilan qurol-yarog‘ yetkazib berish imkonini beruvchi lend-liz dasturini ishga tushirdi.
Izoh (0)