Херсон вилоятининг Россия томонидан босиб олинган қисмида Кремль томонидан тузилган вилоят маъмурияти раҳбари ўринбосари Екатерина Губарева ғойиб бўлди, деб ёзади Meduza.
Губареванинг турмуш ўртоғи Павел Губаревнинг сўзларига кўра, унинг рафиқаси 15 ноябрь соат 16:30 дан бери алоқага чиқмаган. Уни охирги марта Геническда аннексия қилинган Херсон вилояти ҳукумат биноси ёнида кўришган (Россия томонидан тузилган ҳокимиятлар Херсондан қўшинлар чекинганидан кейин Геническка кўчиб ўтган).
Губаревнинг таъкидлашича, Россия томонидан тузилган маъмурият раҳбари Владимир Салдо ҳам Екатерина Губареванинг қаердалигини билмайди.
«ТАСС»нинг хабар беришича, Екатерина Губарева иқтисодий жиноят юзасидан қўзғатилган иш бўйича қўлга олинган. Россия томонидан Херсон вилоятига тайинланган Ички ишлар вазирлиги эса бу маълумотни тасдиқламаган ва инкор ҳам этмаган.
Екатерина Губарева 2014 йилда ўзини ўзи эълон қилган ДХРнинг биринчи ташқи ишлар вазири бўлган, шундан сўнг у узоқ вақт давомида ўзини ўзи эълон қилган республика парламентининг депутати сифатида ишлаган. У 2022 йил июнь ойида Херсон вилоятининг Россия томонидан тузилган маъмурияти раҳбари ўринбосари этиб тайинланган.
Изоҳ (0)