Эроннинг Теҳрон вилояти инқилобий суди 16 ноябрь, чоршанба куни тартибсизликларнинг уч иштирокчисига нисбатан ўлим ҳукмини чиқарди, деб хабар беради Меhr агентлиги.
«Теҳрон инқилобий судида тартибсизликлар ва хавфсизликни бузганлар устидан суд муҳокамаси ва судланувчиларнинг адвокатлари иштирокида ўтказилган суд мажлисидан сўнг яна уч нафар тартибсизликда қатнашган шахсга нисбатан ҳукм ўқилди», — дейилади хабарда.
Агентликнинг қайд этишича, иштирокчиларнинг биринчиси мамлакатдаги жамоат тартибини бузиш, шунингдек, одамлар ва давлат мулкига зарар етказишда айбланиб, жазога тортилган.
«Шунингдек, Теҳрон инқилобий суди чиқарган бошқа ҳужжатга кўра, Пакдаштдаги полиция постига ўт қўйиб, унинг мулкини йўқ қилганликда айбланган иккинчи маҳкум суд томонидан ўлим жазосига ҳукм қилинган. Учинчи айбланувчи давлат мулкига зарар етказган ва тартибсизликларда етакчи рол ўйнагани сабабли ўлимга ҳукм қилинган», — деб қўшимча қилади Меhr.
Аввалроқ Эронда 14 минг нафар намойишчи қатл этилиши мумкинлиги ҳақида хабар берилган эди.
Эрондаги намойишларга нима сабаб бўлди?
Эронда намойишлар сентябрь ўрталарида, 22 ёшли Маҳса Аминийнинг ўлимидан кейин бошланди. Полиция уни Теҳронда метродан чиқиш чоғида ҳижобни нотўғри ўрагани учун ҳибсга олган.Кейинроқ Аминийнинг акаси маълум қилишича, полициячилар у билан «қайта тарбиялаш» ишларини ўтказишга ваъда берган. Полиция участкасидан қиз тез ёрдам машинасида олиб кетилган. Шифокорлар қизда юрак хуружи ва инсульт юз берганини билдирган, у бир неча кундан кейин вафот этган. Эрон полицияси бахтсиз ҳодиса юз берганини даъво қилмоқда.
Эрон ҳукумати фикрича, норозиликлар «ислом режимини заифлаштириш бўйича душман стратегияси»нинг бир қисмидир, мамлакат армияси эса намойишлар фонида «душманларга қарши курашиш» ва хавфсизликни таъминлаш ниятида.
Эрон олий етакчиси Али Хоманаий намойишлар «оддий эронликлар» томонидан ўтказилмаётганини, балки олдиндан режалаштирилганини айтганди, шунингдек, у АҚШ ва Исроилни тартибсизликларни ташкиллаштиришда айблаганди.
Изоҳ (0)