Ер аҳолиси сони 8 миллиарддан ошди, деб хабар бермоқда БМТ матбуот хизмати ўз ҳисоб-китобларига таяниб.
Ер аҳолиси 1 миллиард кишига кўпайиши учун 12 йил керак бўлди. Инсоният 8,5 миллиард кишилик маррадан 2030 йили ўтиши, 10,4 миллиардлик чўққига эса 2080 йилларда чиқиши прогноз қилинмоқда.
Сўнгги 200 йил ичида одамлар сони саккиз марта ошган. Чунончи, 1900 йиллар бошида сайёрада 1,6 миллиард одам яшаган бўлса, 2000 йиллар бошига келиб, уларнинг сони 6 миллиардга, 2011 йилда эса 7 миллиардга етган. Бундай жадал ўсиш тиббиётнинг ривожланиши, санитария соҳасидаги ютуқлар, ичимлик сувидан фойдаланиш имкониятининг кенгайиши, кенг қамровли вакцинация билан изоҳланади.
БМТ қайд этишича, аҳоли сони доимий равишда ортиб бораётганига қарамай, унинг ўсиш суръатлари сўнгги вақтларда секинлашмоқда. Прогнозларга кўра, 2022 йилдан 2050 йилгача бўлган даврда «туғилиш даражасининг доимий равишда паст бўлиши ва, баъзи ҳолларда, эмиграциянинг юқори даражаси туфайли» 60 дан ортиқ мамлакатлар аҳолиси 1 фоизга камаяди.
Шу билан бирга, ташкилот маълумотларига қараганда, 2050 йилгача кутилаётган аҳоли сони ўсиши ҳолатларининг ярми саккизта давлатда кузатилади, булар — Конго Демократик Республикаси, Миср, Эфиопия, Ҳиндистон, Нигерия, Покистон, Филиппин ва Танзания Бирлашган Республикаси.
Изоҳ (0)