АҚШ ҳукумати Hellfire ракеталари ўрнатилган Грэй Eagle МҚ-1C кўп нишонли учувчисиз учар қурилмасини модификация қилиш имкониятини кўриб чиқмоқда, бу ушбу ускунани Украинага юбориш имкони берган бўларди, деб ёзади CNN расмий шахслар орасидаги манбаларига таяниб.

Телеканал суҳбатдошлари айтишича, киритиладиган ўзгартиришлар натижасида Украинанинг ушбу дронларни қўлга киритиш имконияти ошади, чунки муҳим технологиялар билан жиҳозланган ҳар қандай дрондан айрилиш хавфсизроқ бўлади. CNN’нинг Конгрессдаги манбаси таъкидлашича, баъзи техник «ҳийла-найранглар» қўлланилиши мумкин, аммо «бу нарсалар вақт талаб қилади ва жуда қийин».

Аввалроқ АҚШ президенти Жо Байден маъмурияти Киев ва Конгресс аъзоларининг илтимосларига қарамасдан, Украинага илғор учар қурилмаларни юборишдан бош тортгани хабар берилган эди.

Пентагон Грэй Eagle МҚ-1C дронларининг тақдим этилиши низонинг кучайишига сабаб бўлишидан хавфсираб, Киевнинг сўровини рад этган. Шунингдек, бу Москва учун АҚШ Россия ҳудудидаги позицияларни нишонга олиши мумкин бўлган қурол-яроғни юбораётгани ҳақидаги сигнал бўлиши ҳам мумкин эди. Бундан ташқари, Вашингтон агар дронлар уриб туширилса, улардаги технологиялар ўғирланишидан ташвишланган, бироқ бу хавотирлар қарор қабул қилишда ҳал қилувчи бўлмаган, дейилади хабарда.

Грэй Eagle ундан ҳам машҳурроқ бўлган Предатор дронининг бир версиясидир. Унинг парвоз давомийлиги — 30 соатгача. Дрон разведка учун ҳам, зарбалар бериш учун ҳам ишлатилиши мумкин — унга саккизта Ҳелл фире ракеталарини ўрнатиш мумкин.

Ёзда WSJ АҚШнинг Россия Грэй Eagle илғор технологияларини қўлга киритишидан хавфсираётгани ҳақида ёзганди. Америка томони уни етказиб беришни пайсалга солишининг яна бир сабаби — Украина ҳарбийларини Грэй Eagle’ни бошқаришга ўргатиш зарурати бўлди. Reuters маълумотларига кўра, гап Киевга тўртта Грэй Eagle дронларининг тақдим этилиши ҳақида бормоқда. АҚШ бунгача Украинага Switchblade ва Phoenix Ghost камикадзе дронларини етказиб берган.