Украина президенти Владимир Зеленский G20 саммитидаги видеомурожаатида Россия билан асирларни «ҳаммага ҳамма» формуласи бўйича алмашишни таклиф қилди, деб ёзмоқда «Коммерсантъ». Шунингдек, у хавфсизлик кафолатлари бўйича келишув лойиҳаси яратилишини айтди ва Россиядан ўз қўшинларини Украинадан олиб чиқишни талаб қилди.
Зеленский саммит иштирокчиларига қилган мурожаатида Украинадаги можарони «адолатли равишда, БМТ низоми ва халқаро ҳуқуқ асосида» тўхтатиш вақти келганини айтди.
«Илтимос, етакчилик кўрсатинг ва биз биргаликда, албатта, тинчлик формуласини топамиз», — деди Украина раҳбари.
Reuters таъкидлашича, Зеленский нутқи давомида G20 ни «19 талик гуруҳ» деб атаган ва «Россиянинг аъзолигини тан олишдан бош тортган». Украинанинг ўзи G20 га аъзо эмас. Зеленский саммитга мезбонлик қилаётган Индонезия президенти Жоко Видодо томонидан таклиф қилинган.
Маълумот учун Индонезиянинг Бали оролида бугун, 15 ноябрь куни G20 мамлакатлари етакчиларининг саммити бошланди. Индонезия президенти Жоко Видодо саммитдаги биринчи нутқида «урушни тугатиш»га чақирди.
Изоҳ (0)