Инсоннинг қандай ва нима истеъмол қилиши нафақат узоқ умр кўриши ва жисмоний саломатлиги, балки мия соғлиғи, шунингдек, ёшга боғлиқ когнитив ўзгаришларга қарши туриш қобилиятига ҳам таъсир қилади. Агар овқатланиш одатлари бироз ўзгартирилса, кексаликни соғлом фикр, мустаҳкам хотира ва ажойиб кайфиятда кутиб олиш имкониятини сезиларли даражада ошириш мумкин, деб ёзади «Новий очаг».
Ортиқча овқатланмаслик
Одатда инсон тўқлик сигналидан кейин ҳам 20-30 фоизга кўпроқ овқатланади. Аслида ҳар бир инсон секин-аста, яхшилаб чайнашга ва ҳеч нарсага чалғимасдан овқатланишга одатланиши керак. Шунингдек, кичикроқ идишлар ортиқча овқатланишдан сақланишга ёрдам беради, лекин керакли даражада овқатланиш лозим. Соғлом вазн нафақат юрак ва қон томир касалликлари ёки диабетнинг олдини олиш, балки Альцгеймер касаллигига ҳам қарши кучли ҳимоя ҳисобланади.
Мева ва сабзавотларни истеъмол қилиш
Кунига беш порция мева ва сабзавот истеъмол қилиш кексаликка қадар онгни тиниқ сақлашнинг энг осон усули. Деярли 4000 кўнгилли иштирок этган тадқиқот мева ва сабзавотларни мунтазам, етарли даражада истеъмол қилиш кекса ёшдаги инсонларда когнитив пасайишнинг секинлашувини тасдиқлади.
Зираворларни рационга киритиш
Биринчидан, хушбўй ўтлар ва зираворлар таомни янада мазали қилади. Иккинчидан, уларнинг кўпчилиги саратон, артрит, депрессия ва Альцгеймер касаллиги хавфини сезиларли даражада камайтирадиган фойдали антиоксидантларга бой.
Пиширишдан олдин гўштни маринадлаш
Агар қовурилган ёки пиширилган гўштни яхши кўрсангиз, пиширишдан олдин уни маринадлашни унутманг. Бу мияда хавфли ўсмалар ҳосил бўлишининг олдини олишга ёрдам беради. Агар қовурилган гўштдан бутунлай воз кечишга тайёр бўлмасангиз, ҳеч бўлмаганда уни хавфсиз тарзда пишириш мумкин.
Ҳафтада бир марта ёғли балиқ истеъмол қилиш
Балиқлар соғлом ёғларга бой бўлиб, уларда жуда кўп омега-3 кислоталари мавжуд. Бу инсоннинг деярли барча ички органларида яллиғланишни камайтирадиган жуда фойдали бирикмалардир. Ёғли балиқларни мунтазам истеъмол қилиш (ҳафтасига камида бир марта) Альцгеймер касаллигини ривожланиш хавфини 60 фоизга камайтириши мумкин.
Ёнғоқ ва писталарни тез-тез истеъмол қилиш
Омега-3 кислоталарининг яна бир манбаи ёнғоқ ва писталардир. Бундан ташқари, улар мия соғлиғини қўллаб-қувватлайдиган селен ва Э витамини ҳамда Альцгеймер касаллиги хавфини жиддий равишда камайтирадиган антиоксидантларга бой.
Кўпроқ чой ичиш
Антиоксидантларнинг энг арзон манбаи бир пиёла чойдир. Қайси турдаги чойни афзал кўришингиздан қатъи назар: кўк ёки қора чой — уларнинг барчаси катехинларга бой бўлиб, қон томирларининг шикастланишини енгишга ва эркин радикалларнинг зарарли таъсирига қарши курашишга ёрдам беради. Кўк чой эпигаллокатехин-3-галлатга бой — бу Альцгеймер касаллигининг ривожланиш хавфини камайтиради.
Қаҳва
Эрталабки қаҳва Альцгеймерга қарши курашда махфий қуролдир. Қаҳва доналарида эикосаноил-5-гидрокситриптамид (ЭҲТ) деб номланган кимёвий модда мавжуд бўлиб, каламушларда ўтказилган тадқиқотлар Альцгеймер касаллигидан ҳимоя қилишини кўрсатди. Айтганча, бир чашка қаҳва хотирани кучайтиради ва уни ичгандан кейин бир соат ичида янги маълумотларни эслаб қолиш ва қайта ишлаш осонлашади.
Ширинлик ўрнига қора шоколад истеъмол қилиш
Какао миқдори юқори бўлган бир неча бўлак қора шоколад кунлик норма ҳисобланади. Какао таркибида флавоноидлар деб аталадиган антиоксидантлар кўп бўлиб, улар миянинг хотира ва ахборотни қайта ишлаш учун масъул бўлган қисмида қон айланишини ошириб, мияни том маънода ёшартиради.
Изоҳ (0)