Британиялик рассом Бэнкси Киев вилоятидаги Бородянка қишлоғида (Киевдан 35 км, Бучадан 20 км масофада жойлашган) ўзининг янги асарини яратди. Суратлар унинг Instagram’ига жойланди.
Унда вайрон бўлган тўққиз қаватли турар жой деворига туширилган гимнастикачи қизчанинг оқ-қора тасвирини кўриш мумкин. Бу Бэнксининг Instagram’ига ўтган йил декабридан буён қўйилган биринчи пост бўлди.
Шу йилнинг мартида Рассомнинг 2005 йилги урушга қарши CНД Солдиэрс картинаси #ABANKSY4UKRAINE аукциони доирасида 81 минг фунт стерлингга сотилганди. Унда ядровий қуролсизланиш бўйича кампания рамзини чизаётган икки аскар тасвирланган. Олинган пулларни Киевдаги «Охматдет» болалар касалхонасига ёрдам бериш учун йўналтириш режалаштирилган эди.
Бородянка ва Бучани Россия ҳарбийлари махсус операция бошланганидан кейин тезда босиб олган эди. Москва ва Киев Истанбулдаги музокаралар чоғида Россия томонидан «Киев ва Чернигов йўналишларида ҳарбий фаоллик»нинг камайтирилиши ҳақида келишиб олганидан кейин, 30 март куни Россия армияси бу аҳоли пунктларини тарк этган.
1 апрель куни Буча маъмурияти вакиллари шаҳар кўчаларида одамлар жасадлари ётгани ҳақида хабар берди. Икки кундан кейин ОАВлар, шунингдек, Украина ҳукумати Бучадан олинган кадрларни эълон қилди, уларда жасадларни кўриш мумкин. Reuters улар тинч аҳолига тегишли мурдалар эканини маълум қилди.
Россия Мудофаа вазирлиги бунга жавобан Россия ҳарбийлари Бучада тинч фуқароларнинг ўлдирилишига алоқадор эмаслигини, эълон қилинган хабарлар эса провокация эканини маълум қилди. «Бирорта ҳам тинч фуқаро жабр кўрмаган», — дейишди идорада.
Мавзуга доир:
- Бэнксининг шредер ёрдамида майдаланган сурати яна сотувга қўйилади. Унинг нархи 4 баробарга ошган
- Бэнкси аноним қолишни истагани сабаб сўнгги 10 ойда олтита картинасининг муаллифлик ҳуқуқидан айрилди
- Бэнксининг суперқаҳрамон-ҳамшира ҳақидаги сурати аукционда қарийб 17 млн фунтга сотилди. Бу рассом ишлари орасидаги энг қиммат асар
Изоҳ (0)