АҚШнинг Россия билан муносабатлардаги «яширин мақсади» маълум бўлди

Украинадаги низо туфайли кескинлик ўсиб бораётганига қарамай, АҚШ президенти Жо Байден маъмурияти Россия билан ядровий қурол-яроғлар устидан назорат бўйича музокараларни қайта бошламоқчи. Бу ҳақда Foreign Policy журнали хабар берди.

Нашрнинг собиқ ва амалдаги америкалик мансабдорлар орасидаги манбаларига кўра, Москва ва Вашингтон ўртасидаги музокаралар яқин келажакда Қоҳирада бўлиб ўтади. Бу қурол-яроғ устидан назорат соҳасидаги мулоқотни қайта бошлаш йўлида биринчи қадамга айланади.

Стратегик ҳужум қуролларини (СҲҚ) қисқартириш ҳақидаги шартнома бўйича музокараларни қайта тиклаш 2022 йил ёзидан буён Оқ уй ва Давлат департаментининг яширин мақсади бўлиб келган, деди манбалар. Хусусан, ушбу масалада Россия томони билан янги учрашув режаси бир неча ойлар давомида ишлаб чиқилган.

АҚШ Давлат департаменти вакили Нед Прайс 8 ноябрь куни Вашингтон СҲҚ-3 шартномаси доирасида назоратни қайта тиклаш бўйича музокараларга тайёрлигини билдирганди. Унинг сўзларига кўра, томонлар яқин келажакда учрашув ўтказишга келишиб олган.

Bloomberg Москвадаги манбаларига таяниб ёзишича, Швейцария Россияга қарши санкцияларга қўшилгани учун, учрашув Қоҳирада ўтказилиши мумкин.

Август бошида Россия ўз объектларини СҲҚ бўйича назорат фаолияти остидан вақтинчалик чиқарди. Россия Ташқи ишлар вазирлиги қарор «мажбуран» қабул қилинганини айтиб, АҚШни «мавжуд воқеликлар»ни ҳисобга олмаган ҳолда назорат фаолиятини қайта бошлашга уринишда айблади.

Россия ТИВ сентябрь охирида АҚШ президенти Жо Байден маъмурияти томонидан ШҚ шартномаси бўйича мулоқотни бошлашга оид «баъзи сигналлар»ни сезган. Кремлда ҳам июнь ойида СҲҚ-3 бўйича музокараларни қайта бошлашга тайёрлик маълум қилинган.

СҲҚ-3 шартномаси 2010 йилда Россия ва АҚШ президентлари Дмитрий Медведев ва Барак Обама ўртасида яна беш йилга чўзиш имконияти билан ўн йилга имзоланган эди. 2021 йилда Россия президенти Владимир Путин шартномани 2026 йил 5 февралгача узайтириш ҳақидаги келишувни ратификация қилди. 2020 йилда томонлар бу фаолиятни пандемия туфайли тўхтатиб қўйган.

Шартномага кўра, томонларнинг ҳар бири ишлатишга тайёр бўлган кўпи билан 1550 та ядро зарядлари, 700 дан ортиқ бўлмаган қитъалараро баллистик ракеталар, сувости кемалари баллистик ракеталари ва стратегик ракета ташувчи бомбардимончилар, 800 дан кўп бўлмаган пуск қурилмаларига эга бўлиши мумкин.